Listería fannst í reyktum laxi Ísfirðings

Hallgerður Kolbrún E. Jónsdóttir skrifar 18. febrúar 2022 11:24

Listería fannst í reyktum laxi og reyktum regnboga merktum Ísfirðingi. MAST

Bakterían Listeria monocytogenes, eða listería, greindist í sýnum af reyktum laxi og reyktu regnboga sem framleiddur var undir nafni Ísfirðings. Dreifing og sala afurðanna hefur verið stöðvuð.

Þetta kemur fram í tilkynningu frá Matvælastofnun. Þar segir að reykti laxinn ætti ekki að vera í dreifingu í verslunum en neytendur gætu átt vöruna í frysti eða kæli.

Fiskvinnslan Hrefna hefur tilkynnt Matvælastofnun að vegna varúðarsjónarmiða sé varað við neyslu og varan innkölluð frá neytendum. Innköllunin nær til dagsetningarinnar: „Síðasti notkunardagur 14.02.2022“.

Framleiðslulotan var framleidd í desember, fryst hjá framleiðanda og sett á markað í janúar. Lotan var fyrst sett á markað í desember með síðasta notkunardegi 14.01.2022 og því er einnig varað við neyslu hennar.

Nánar um vörulotu laxins:

Vöruheiti: Ísfirðingur - REYKTUR LAX
Dreifing: Til verslana Nettó, Kjörbúðanna, Krambúðanna, Iceland, Melabúðarinnar, Me og Mu, Heimkaup.is og Hraðbúðarinnar Hellissandi
Geymsluskilyrði: Kælivara við 0-4 °C
Síðasti notkunardagur: 14.1.02022; 14.02.2022; 08.03.2022
Framleiðandi: Fiskvinnslan Hrefna

Þá greindist listería einnig í reyktum regnboga með síðasta notkunardegi 08.03.2022.

Nánar um vöruna:

Vöruheiti: Ísfirðingur - REYKTUR REGNBOGI
Framleiðandi: Fiskvinnslan Hrefna
Síðasti notkunardagur: 08.03.2022
Geymsluskilyrði: Kælivara við 0-4 °C
Dreifing: Til verslana Nettó, Kjörbúðanna, Krambúðanna, Iceland, Melabúðarinnar, Me og Mu og Heimkaup.is

Neytendur sem keypt hafa vörurnar eru beðnir að farga henni eða skila með því að hafa samband við Fiskvinnsluna Hrefnu ehf, s. 8943653 eða netfang fiskvinnslanhrefna@gmail.com.

Listería getur orsakað sjúkdóm hjá bæði mönnum og dýrum og kallast sá sjúkdómur listeriosis. Einkenni sjúkdómsins eru mild flensueinkenni, vöðvaverkir, hiti og stundum ógleði og niðurgangur. Alvarleg einkenni eru heilahimnubólga í ungbörnum, blóðeitrun og getur sjúkdómurinn einnig valdið fósturláti. Í einstaka tilfellum getur bakterían valdið dauða, þá er yfirleitt um að ræða einstaklinga sem eru með skert ónæmiskerfi.

Neytendur Innköllun

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir