Reynt að vanda mjög til verka

Rótarýdagurinn er haldinn í dag, hann er tileinkaður fjölmenningu og þar leggja félagar í rótarýklúbbnum Borgir í Kópavogi sitt af mörkum. Forseti hans er Bjarnheiður Guðmundsdóttir.

 „Við erum með átak í að styrkja nýbúa í bænum,“ segir hún. „Keyptum til dæmis bílstóla fyrir nýju flóttabörnin og í dag er að hefjast þriggja ára tilraunaverkefni sem felst í félagslegum stuðningi við þá nemendur í MK af erlendum uppruna, sem hans þurfa við.“ 

Í Menntaskólanum í Kópavogi eru um 50 nemar af erlendum uppruna. Tilraunaverkefni skólans og Rótarýklúbbsins Borgir gengur út á að hverjum nemanda sem stendur höllum fæti félagslega sé valinn stuðningsnemandi „mentor“. Þeir muni hittast einu sinni til tvisvar í viku, ýmist innan eða utan skóla og Rótarý greiði útlagðan kostnað svo sem fyrir bíómiða, strætó eða annað sem þarf.



Borgir er einn af þremur rótarýklúbbum í Kópavogi. „Hér eru morgunklúbbur, hádegisklúbbur og kvöldverðarklúbbur. Borgir er morgunklúbburinn sem þýðir að við hittumst fyrir vinnu einu sinni í viku,“ lýsir Bjarnheiður.

Hver nennir því? hrekkur upp úr blaðamanni. „Það hefur verið ágætis aðsókn. Við byrjum skipulegan fund kortér fyrir átta en erum yfirleitt komin um hálf átta til að eiga góða stund með vinum og félögum og svo erum við alltaf búin kortér fyrir níu, til að komast á vinnustað.“

Um áttatíu manns eru í klúbbnum að sögn Bjarnheiðar og um sjötíu þeirra mættu á fundinn nú í vikunni - en hvað fer fram á þessum fundum?

„Það er eins og Vigdís Finnbogadóttir sagði um sinn Rótarýklúbb: „Fundur er eins og fullorðinsfræðsla í háskóla.“ Við fáum fyrirlesara með margbreytileg efni. Síðast fengum við frábæran fyrirlestur um vinnudeilur hjá Magnúsi Péturssyni, fyrrverandi sáttasemjara.

En við byrjum fundina á því að syngja saman og sláum alltaf á létta strengi meðfram því að fjalla um alvarlegri mál eins og verkefni í vanþróuðum ríkjum og samfélagsþjónustu í nærumhverfinu. Það er reynt að vanda mjög til verka.“

Bjarnheiður segir jöfn hlutföll milli karla og kvenna í klúbbnum. „Það er enginn forseti nema eitt ár í einu og reglan er sú að annað hvert ár er forsetinn kona og hitt árið karl. Þannig er með öll embætti innan klúbbsins, við leggjum mikið upp úr jafnrétti.“