Ljós dempuð í kirkjunni

Sænska félagið hélt Lúsíuhátíð í Seltjarnarneskirkju í gærkvöld, en í Svíþjóð er slík hátíð haldin 13. desember þar sem Lúsía og og þernur hennar syngja jólalög. Matilda Gregersdotter, formaður Sænska félagsins, segir um árvissan viðburð að ræða hér. "Þetta er óskaplega falleg athöfn sem byrjar á því að ljósin eru dempuð í kirkjunni og svo kemur inn skrúðgangan með lifandi ljós, áður en sjálfir tónleikarnir hefjast," sagði hún skömmu fyrir æfingu vegna hátíðarinnar um miðjan dag á mánudag, en Matilda er sjálf í kórnum.