Tom Cruise neitaði að dansa Gangnam Style

Tom Cruise vildi ekki dansa Gangnam Style þegar hann var staddur í Suður-Kóreu, heimalandi söngvarans Psy, til að kynna sína nýjustu kvikmynd, Jack Reacher. „Hann gerir það betur en ég,“ sagði Cruise á blaðamannafundi vegna myndarinnar og átti þar við Psy. „Ég er mjög ánægður með hversu vel honum hefur gengið. Allir hafa haft gaman af þessu.“ Cruise tjáði sig á Twitter í september um Gangnam Style og sagði Psy eiga bjarta framtíð fyrir sér. Því bjuggust margir Suður-Kóreubúar við því að hann myndi dansa dansinn en þeir urðu fyrir vonbrigðum.