Heimsmarkmiðin

Skortur á framlögum bitnar á flóttafólki í Úganda

Heimsljós
Gunnisal

Niðurskurður fjárstyrkja til flóttafólks hefst í febrúar á næsta ári. Þá fær flóttafólk í Úganda aðeins 60 prósent af fullum stuðningi.

Matvælaáætlun Sameinuðu þjóðanna (WFP) – handhafi friðarverðlauna Nóbels í ár – varaði við því í gær að mánaðarlegir fjárstyrkir og matargjafir til 1,26 milljóna flóttamanna í Úganda verði skornir enn frekar niður vegna ónógra framlaga. Niðurskurðinn hefst í febrúar á næsta ári. Þá fær flóttafólk í Úganda, flest frá grannríkinu Suður-Súdan, aðeins 60 prósent af fullum stuðningi.

„Heimsfaraldurinn má ekki vera afsökun fyrir heiminn að snúa baki við flóttafólki á þessum hræðilegu tímum,“ segir El-Khidir Daloum umdæmisstjóri WFP í Úganda. „Við þökkum framlagsríkjum fyrir að hafa að fullu stutt aðgerðir okkar í þágu flóttafólks í Úganda árið 2019 en núna getum við ekki einu sinni staðið undir lágmarks matvælaaðstoð og þeir fátækustu koma til með að þjást mest þegar skera þarf enn frekar niður,“ segir hann.

Árið hefur verið flóttafólki sérstaklega erfitt því stuðningurinn var skorinn niður um 30 prósent í apríl vegna faraldursins og fyrirsjáanlegt að í febrúar nemi frekari niðurskurður 10 prósentum. Matvælaáætlun Sameinuðu þjóðanna þarf 95,8 milljónir bandarískra dala – 12,5 milljarða íslenskra króna – til að veita fullan stuðning við flóttafólk næstu sex mánuðina.

Samkvæmt frétt WFP eru það einkum konur, börn og aldraðir í hópi þeirra verst stöddu sem eiga á hættu að verða vannærð. Það veikir ónæmiskerfið og eykur líkur á smitsjúkdómum, meðal annars COVID-19. Á þessu svæði eru sex samfélög flóttamanna og kórónaveiran er þar í mikilli uppsveiflu.

Matvælaáætlun Sameinuðu þjóðanna er ein af áherslustofnunum Íslands í mannúðarmálum og Úganda er annað tveggja samstarfslanda Íslands í tvíhliða þróunarsamvinnu. Í samfélögum flóttafólks hafa Íslendingar í samstarfi við UNICEF unnið að verkefni um sólardrifnar vatnsveitur fyrir skóla og heilsugæslustöðvar.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.