Viðskipti erlent

Mastercard með Pornhub til skoðunar vegna ásakana um barnaníð

Kolbeinn Tumi Daðason skrifar
Mótmælandi í Bangkok í Taílandi þar sem yfirvöld lokuðu fyrir aðgang fólks að klámsíðunni í byrjun nóvember. Fjölmargir brugðust ókvæða við aðgerðum stjórnvalda og mótmæltu á götum úti.
Mótmælandi í Bangkok í Taílandi þar sem yfirvöld lokuðu fyrir aðgang fólks að klámsíðunni í byrjun nóvember. Fjölmargir brugðust ókvæða við aðgerðum stjórnvalda og mótmæltu á götum úti. Getty Images/Yuttachai Kongprasert

Kortafyrirtækið Mastercard hefur til skoðunar ásakanir á hendur klámsíðunni Pornhub.com í kjölfar fullyrðinga um að á síðunni megi finna fjölmörg dæmi um barnaníð.

Reuters greinir frá.

Fram kom í umfjöllun blaðamannsins Nicholas Kristof í The New York Times að á síðunni mætti finna upptökur af árásum á meðvitundarlausar konur og stelpur.

„Vandamálið er ekki klám heldur nauðganir. Við hljótum öll að geta verið sammála um að kynferðisleg misnotkun á börnum eða hverjum sem er sé ekki í lagi,“ sagði í pistli Kristof.

Pornhub hefur neitað ásökununum.

„Allar ásakanir þess efnis að við leyfum barnaníðsefni er óábyrgar og ósannar,“ sagði í yfirlýsingu Pornhub til Reuters.

Pornhub svipar að mörgu leyti til YouTube að því leyti að þar getur fólk hlaðið upp efni. Talið er að heimsóknir á síðuna nemi 3,5 milljörðum í hverjum mánuði sem er meira en Netflix og Amazon geta státað af. Pornhub hefur tekjur af auglýsingabirtingum sem nema þremur milljörðum birtinga daglega. Pornhub hefur komist á lista yfir tíu mest sóttu vefsíður í heiminum.

Kristof segist hafa rætt við móður fimmtán ára stúlku sem leitað var að í Flórída. Móðir hennar fann hana á Pornhub í 58 myndböndum. Þá segir hann að kynferðisleg misnotkun á fjórtán ára stúlku í Kaliforníu hafi verið birt á Pornhub og málið ratað á borð lögreglu. Bekkjarbróðir stúlkunnar sá myndböndin og tilkynnti.

Í báðum tilfellum voru aðilar sem tengdust málinu handteknir en Pornhub slapp með skrekkinn þótt myndböndunum hefði verið dreift á síðunni og fyrirtækið haft tekjur af þeim.

Pornhub er ólíkt YouTube að því leyti að hægt er að hlaða niður myndböndum. Þannig geta myndbönd verið komin í mikla dreifingu og í hendur fjölda fólks áður en Pornhub hefur brugðist við og fjarlægt efnið.

Mastercard segist ætla að bregðast við um leið og stöðva viðskipti Pornhub ef fótur reynist fyrir ásökunum sem birtust í New York Times.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Engar hækkanir skráðar í dag

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.