Matur

Laufabrauðstaco frá Hvammstanga var ljómandi gott

Kolbeinn Tumi Daðason skrifar
Tilraunastarfsemi Andra á Hvammstanga vakti athygli netverja í dag. Eðlilega enda ekki á hverjum degi sem laufabrauðið er fært í nýjan búning.
Tilraunastarfsemi Andra á Hvammstanga vakti athygli netverja í dag. Eðlilega enda ekki á hverjum degi sem laufabrauðið er fært í nýjan búning.

Sumir steikja laufabrauð á hefðbundna mátann og svo eru aðrir sem hugsa út fyrir kassann og úr verður laufabrauðstaco. Andri P. Guðmundsson frá Hvammstanga birti í dag mynd af tilraunastarfsemi sinni í Húnaþingi vestra og ekki stóð á viðbrögðunum.

„Þetta var bara ljómandi gott,“ segir Andri um réttinn sem samanstóð af laufabrauði, hangikjötshakki, heitu rauðkáli, grænbaunasalsa og uppstúf. Svo kreisti hann mandarínu yfir.

Andri segist hafa bakað laufabrauðið í ofni til að ná fram taco-forminu. Til þess hafi hann notað álpappír og úr urðu vel stökkar skeljar. Þá var hægt að hefjast handa við að fylla skeljarnar af fyrrnefndum áleggjum.

Hann segist kunna að meta góða taco en haldi ekki þriðjudagana hátíðlega með taco-kvöldum eða neitt slíkt. Fjölskyldan hafi ráðist í laufabrauðsgerð um helgina og þetta hafi verið tilraun, hálfgert grín, sem hafi tekið ljómandi vel.

„Namm“, „Siðlaust“, „Game changer“ og „Þetta er stórkostlegt og svo fallegt“ eru á meðal viðbragða við réttinum á Twitter þar sem notendur eru óhræddir við að segja sína skoðun.

Aðspurður segist Andri ekki hafa ákveðið hvort hann endurtaki leikinn að ári þegar laufabrauðið verður steikt.

Séríslenskt fyrirbæri

Laufabrauð er séríslenskt fyrirbæri en þó útskorin jólabrauð tíðkist víða í Evrópu er sérstakt hversu næfurþunnt og fagurlega skreytt laufabrauðið er. 

Ástæðan fyrir því er eflaust sú að á öldum áður var mjöl af skornum skammti og til að allir fengju brauð að bíta í á jólunum var deigið flatt út eins þunnt og mögulegt er. 

Elsta heimild um laufabrauð er úr orðabók Jóns Ólafssonar frá Grunnavík frá árinu 1736 en þar segir að brauðið sé sælgæti Íslendinga. 

Laufabrauðsgerðin var oft daginn fyrir Þorláksmessu og stundum sameinaðist fólk af fleiri bæjum til að hjálpast að en þetta var oft eina skiptið sem karlmennirnir komu nokkuð nálægt húsverkum.

Árni Ólafur úr Hinu blómlega búi fræddi áhorfendur Stöðvar 2 og Vísis um laufabrauðsgerð fyrir jólin í fyrra. Uppskriftina má sjá hér.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.