Heimsmarkmiðin

Atvinnulífið hvatt til þátttöku í verkefnum í þróunarríkjum

Heimsljós

„Samstarfssjóðurinn skapar bæði ný tækifæri fyrir íslenskt atvinnulíf og íbúa þróunarríkja sem skortir oft tækni og þekkingu til að lyfta sér upp úr fátækt. Með réttum formerkjum geta fyrirtæki í okkar heimshluta lagt mikið af mörkum í þeirri baráttu með því að auka framleiðni og skapa störf, ekki síst meðal kvenna,“ segir Guðlaugur Þór Þórðarson utanríkis- og þróunarsamvinnuráðherra.

Samstarfssjóður við atvinnulíf um heimsmarkmið Sameinuðu þjóðanna auglýsir þessa dagana eftir umsóknum um styrki og hvetur íslensk fyrirtæki til að leggja sitt af mörkum til að ná heimsmarkmiðunum fyrir árið 2030. Guðlaugur Þór segir hlutverk sjóðsins vera að hvetja til þátttöku atvinnulífsins í þróunarsamvinnu og markmiðið sé að draga úr fátækt og styðja við atvinnusköpun og sjálfbæran vöxt í fátækum ríkjum heims. Þróunarríkin kalli sjálf eftir slíkum verkefnum.

Þegar hafa sex íslensk fyrirtæki hlotið styrki úr sjóðnum, Marel, Thoregs, CreditInfo, Aurora Seafood, Atmonia og Ocean Excellence, en auk þess hafa þrjú önnur fengið vilyrði um styrk.

Hámarksfjárhæð til einstakra verkefna nemur hæst 200 þúsundum evra yfir þriggja ára tímabil – eða um 30 milljónum íslenskra króna. Heimilt er að veita styrk til sama verkefnis til allt að þriggja ára, með fyrirvara um fjárheimildir fjárlaga hvers árs. Styrkfjárhæð getur numið allt að 50% af heildarkostnaði verkefnis. Einnig er opið fyrir umsóknir til forkönnunarstyrkja (e. prefeasibility). Forkönnunarstyrkjum er ætlað að styðja við hugmyndir eða verkefni á frumstigi sem geta leitt af sér stærra þróunarverkefni. Forkönnunarstyrkir geta numið allt að tveimur milljónum króna.

Utanríkisráðherra úthlutar styrkjum að fengnu áliti þriggja manna matshóps sem er skipaður þremur sérfræðingum á sviði þróunarsamvinnu. Umsóknir þurfa að berast fyrir miðnætti 7. desember og áætlað er að niðurstöður ráðherra liggi fyrir í byrjun næsta árs.

Vefur sjóðsins

Aðkoma atvinnulífsins ein helsta forsenda framfara/ Fréttablaðið

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.