Atvinnulíf

Frumsýning á myndböndum um einelti á vinnustöðum

Rakel Sveinsdóttir skrifar
eineltis

„Við ákváðum strax að hafa fræðsluefnið í formi teiknaðs myndbands og gera það eins tímalaust og kostur er þannig að það verði ekki „útrunnið“ strax í næsta mánuði. Eins vildum við hafa það á tveimur tungumálum, íslensku og ensku“ segir Hildur Jóna Bergsdóttir um myndbönd sem frumsýnd eru í dag um einelti á vinnustað. Að sögn Hildar eru þetta þrjú fræðslumyndbönd um hvað einelti er, hvaða áhrif einelti hefur á fólk og vinnustaði og hvernig best er að bregðast við.

Í dag og á morgun fjallar Atvinnulífið um viðkvæm mál í starfsmannahópum annars vegar og hvernig hægt er að nýta tilfinningagreind í starfi hins vegar. Í þessari annarri grein af þremur er sagt frá forvarnarstarfi gegn einelti á vinnustöðum.

Hildur er sálfræðingur að mennt og starfar sem sérfræðingur í mannauði hjá Landsvirkjun. Hún segir söguna á bakvið fræðslumyndböndin fallega sögu en myndböndin eru unnin í samstarfi Landsvirkjunar og minningarsjóðs um dr. Brynju Bragadóttur sálfræðing. Dr. Brynja lést árið 2015 en hafði helgað starf sitt rannsóknum og ráðgjöf varðandi einelti á vinnustað.

„Í lok síðasta árs var ákveðið að endurnýja fræðsluefnið hjá okkur varðandi einelti. Þá hófst leit af stafrænu fræðsluefni varðandi þennan málaflokk á íslensku og ensku en við fundum ekki það sem við leituðum að.

Á sama tíma var minningarsjóður Dr. Brynju Bragadóttur að óska eftir umsóknum í sjóðinn varðandi þetta málefni. Eftir smá umhugsun ákváðum við að fara í samstarf við þau og vinna efni sem gæti hentað fleirum“ 

segir Hildur.

Að sögn Hildar hefur Landsvirkjun um árabil verið með fræðslu meðal starfsfólks um einelti á vinnustað og þar er einnig unnið eftir viðbragðsáætlun varðandi einelti. „Til stuðnings við starfsfólk og stjórnendur í málum er varða samskipti þá erum við í samstarfi við ytri þjónustuaðila þegar þessi mál koma upp“ segir Hildur.

Hún segir marga hafa komið að gerð myndbandanna og það hafi verið lærdómsríkt ferli að fara í gegnum þá vinnu. Vinnan hófst í janúar og henni lauk núna í ágúst. Afraksturinn eru þrjú stutt myndbönd sem sjá má hér að neðan.

#1: Skilgreining á einelti og algengar birtingamyndir

Einelti felur í sér síendurtekna hegðun og á líka við um hegðun sem birtist síendurtekið í rafrænu formi.

#2: Áhrif, hlutverk og æskileg viðbrögð

Í þessi myndbandi má sjá hvaða áhrif einelti hefur á þolanda en eins hvert hlutverk stjórnenda er. Þá er farið yfir einkenni þeirra sem oft eru, meðvitað eða ómeðvitað, þátttakendur að einelti á vinnustöðum miðað við eftirfarandi skilgreiningar:

  • Meintur gerandi
  • Meðhlaupari
  • Stuðningsaðili
  • Hlutlaus áhorfandi
  • Hugsanlegur verndari

#3: Úrvinnsla eineltismála og mikilvægi góðrar menningar

Í þessu myndbandi eru leiðbeiningar um það hvernig vinnustaðir geta staðið að viðbragðsáætlunum gegn einelti og mikilvægi þess að slík viðbragðsáætlun sé til staðar og starfsfólki kunnugt.


Tengdar fréttir





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×