Veiði

Sterkur hrygningarstofn í Langá

Karl Lúðviksson skrifar
Samkvæmt rannsóknum er hrygningarstofninn í Langá sterkur.
Samkvæmt rannsóknum er hrygningarstofninn í Langá sterkur. Mynd: KL

Langá á Mýrum er ein af þeim ám sem vel er fylgst með og það hefur verið þannig síðan 1974 sem er mjög mikilvægt til að fylgjast með heilsu laxastofnsins í ánni.

Sigurður Már Jónsson, fiskifræðingur, hefur um árabil annast þessar rannsóknir. Hann segir stöðu Langárstofnins sterka og hrósar veiðimönnum fyrir ábyrga hegðun á undanförnum árum. Þannig hafi veiðifyrirkomulagið og auknar sleppingar tryggt viðgang stofnsins. Það hafi sannarlega sýnt sig sumarið 2019, þegar laxgengd var lítil og veiðimenn tóku höndum saman um að sleppa veiddum fiski.

“Það má kannski segja að vatnsleysið síðasta sumar hafi verið lán í óláni, þar sem aðstæður drógu úr veiðinni. Fyrir ofan Sveðjufoss var veiðihlutfallið undir 20%, sem er það lægsta sem mælst hefur frá því rannsóknir hófust sumarið 1974. Fyrirfram var búist við slöku sumri, þar sem klakárgangur 2015 var lítill og því var biðlað til veiðimanna að sleppa sem mestum fiski. Veiðimenn tóku vel í þá ósk og slepptu fiski í meira mæli en nokkru sinni fyrr! Það skilaði sér svo sannarlega, því lágt veiðihlutfall og miklar sleppingar urðu til þess að hrognaþéttleiki ofan við Sveðjufoss mældist í haust 3.0 hrogn/m2. Það eru frábærar niðurstöður,” segir Sigurður Már.

Á árunum 2000-2002 og 2014 voru göngur upp fyrir Sveðjufoss svipaðar og í fyrra, en veiðihlutfallið miklu hærra og litlu var sleppt. Fyrir vikið var hrygningarstofn og hrognaþéttleiki lítill. Með breyttum veiðireglum og samstilltu átaki veiðimanna á síðasta veiðisumri eru líkur til þess, að klakárgangurinn 2020 verði miklu betri veiðitölur sumarsins gáfu tilefni til að ætla.

SVFR fagnar þessum rannsóknarniðurstöðum, enda er laxastofn Langár á Mýrum einstakur. Það sama á við um samtarf SVFR og veiðifélags árinnar, sem vinna saman að því að tryggja vöxt og viðgang þessarar veiðiperlu á Mýrunum. SVFR þakkar félagsmönnum jafnframt fyrir þeirra framlag og ábyrga breytni á veiðislóð.

Þessi frétt er af vef SVFR.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.