Atvinnulíf

Gripið til stórra sem smárra aðgerða á vinnustöðum

Rakel Sveinsdóttir skrifar
Efri röð frá vinstri: Auðbjörg Ólafsdóttir hjá Marel, Elín Hjálmsdóttir hjá Eimskipum, Halla Jónsdóttir hjá Héraðsdómi Reykjavíkur. Neðri röð frá vinstri: Baldur G. Jónsson Landsbankanum og Elín Gränz
Efri röð frá vinstri: Auðbjörg Ólafsdóttir hjá Marel, Elín Hjálmsdóttir hjá Eimskipum, Halla Jónsdóttir hjá Héraðsdómi Reykjavíkur. Neðri röð frá vinstri: Baldur G. Jónsson Landsbankanum og Elín Gränz Vísir

Fyrirtæki og stofnanir á Íslandi grípa nú til aðgerða til að fyrirbyggja smitleiðir kórónuveirunnar og auka á öryggi starfsmanna og reksturs. Þessar aðgerðir eru allt frá því að draga úr samgangi á milli ólíkra vinnustöðva yfir í að skipta vatnskönnum út fyrir vatnsbrúsa í dómsölum. Félögin Marel og Eimskip þurftu bæði að grípa til aðgerða í Kína í kjölfar veirunnar og segir Auðbjörg Ólafsdóttir samskiptastjóri Marel að starfsfólk þeirra í Kína hafi unnið þrekvirki við að tryggja öryggi starfsfólks félagsins þar. Breyttar venjur eru víða í mötuneytum og þrif hafa verið aukin. Viðbragðsáætlanir liggja fyrir hjá sumum þar sem búið er að gera áætlanir um hvernig brugðist verður við mögulegum fjöldaforföllum vegna sóttkvía.

Spurt var: „Hefur fyrirtækið/stofnunin brugðist við kórónuveirunni með einhvers konar varúðarráðstöfunum, breytingum eða viðbragðsáætlunum?"

Marel: Snemmtækar aðgerðir

Auðbjörg Ólafsdóttir samskiptastjóri Marel segir fyrirtækið hafi frá því í janúar starfrækt viðbragðstreymi sem fylgist náið með útbreiðslu veirunnar. Alls starfa um 6.300 manns hjá fyrirtækinu í yfir 30 löndum og því sé mikil vinna í því fólgin að samræma allar aðgerðir á heimsvísu.

„Auk viðbragðsteymis sem tekur samræmdar ákvarðanir á heimsvísu starfrækir Marel einnig viðbragðsteymi á níu starfsstöðvum út um allan heim,“ segir Auðbjörg og bætir við „Þessi teymi vinna samkvæmt samræmdum aðgerðum félagsins og samkvæmt fyrirmælum yfirvalda í hverju landi fyrir sig.“

Aðstæður geta verið afar mismunandi á milli starfstöðva en Auðbjörg segir að vegna hraðrar útbreiðslu veirunnar hér á landi síðustu daga hafi verið gripið til snemmtækra aðgerða hjá Marel í Garðabæ.

„Enginn starfsmaður Marel er smitaður af veirunni en við viljum grípa til fyrirbyggjandi aðgerða strax og sýna samfélagslega ábyrgð gegn útbreiðslu veirunnar,“ segir Auðbjörg. Þannig eru engar óþarfa heimsóknir leyfðar til fyrirtækisins næstu vikurnar, fyrirhugaðri árshátíð félagsins sem fara átti fram 21.mars næstkomandi hefur verið frestað og líkamsræktaraðstöðu lokað. Þá hefur fyrirkomulagi við hádegismat verið breytt.

Auðbjörg segir starfsfólk hafa sýnt mikla ábyrgð og jafnvel þrekvirki frá því að veiran kom fyrst upp.

„Í Kína hefur starfsfólk okkar unnið þrekvirki við að tryggja öryggi starfsfólks og  daglegan rekstur og auk þess náð að vera til staðar fyrir viðskiptavini okkar í þessum erfiðu aðstæðum,“ segir Auðbjörg en eins sé mikilvægt að tryggja öryggi þeirra sem ferðast á vegum Marel. Þar segir hún félagið starfa í samstarfi við International SOS, alþjóðlegu heilbrigðisfyrirtæki og heilbrigðisyfirvöldum í hverju landi.

Að sögn Auðbjargar hefur Marel einnig hvatt starfsfólk til að draga úr ferðalögum eins og kostur er og sleppa því að koma til vinnu ef það ferðast til baka af skilgreindum hættusvæðum.

Þá hefur Marel tekið ákvörðun um að sleppa þátttöku í alþjóðlegum sýningum á borð við sjávarútvegssýningarnar í Boston og Brussel og níu öðrum alþjóðlegum sýningum sem halda átti fyrir 1.maí næstkomandi.

Auðbjörg segir starfsemi Marel líka þess eðlis að allar varúðarráðstafir skipti miklu máli.

„Þörfin fyrir örugg, rekjanleg og hagkvæm matvæli framleidd á sjálfbæran hátt hefur aldrei verið meiri en nú,“ segir Auðbjörg. Að hennar sögn sé félagið því ekki aðeins að tryggja öryggi starfsfólks síns og rekstraröryggi heldur sé félagið líka meðvitað um það hlutverk fyrirtækisins að tryggja framboð öruggra, rekjanlegra og hagkvæmra matvæla.

Baldur G. Jónsson mannauðstjóri Landsbankans segir viðbragðsáætlun liggja fyrir vegna mögulegra fjöldaforfalla starsfólks.Vísir/Landsbankinn

Landsbankinn: Viðbragðsáætlun til staðar vegna mögulegra fjöldaforfalla

Að sögn Baldurs Gísla Jónssonar mannauðstjóra Landsbankans er megin áhersla lögð á að fylgja eftir öllum tilmælum og leiðbeiningum frá sóttvarnarlækni og Embætti landlæknis. Upplýsingum sé miðlað reglulega til starfsfólks sem hefur brugðist mjög vel við og með ábyrgum hætti.

„Starfsfólk sem kemur af skilgreindum hættusvæðum fer að sjálfsögðu í heimasóttkví og ef upp koma vafatilvik heldur fólk sig heima þar til staðan skýrist,“ segir Baldur. Hjá bankanum getur starfsfólk í mörgum tilvikum sinnt verkefnum að heiman. Bankinn hefur því hvatt starfsfólk til að vinna að heiman ef það finnur fyrir einkenni kvefs eða flensu.

 „Við höfum líka ítrekað við starfsfólk að vera heima ef það finnur fyrir einkennum kvefs eða flensu, jafnvel þótt enginn grunur sé um smit af völdum COVID-19-veirunnar,“ segir Baldur og eins hefur starfsfólk bankans verið beðið um að láta vita af ferðalögum sínum til útlanda, bæði ferðalögum sem er lokið og fyrirhuguðum ferðum.

„Þetta er aðallega gert til að auka yfirsýn og til að við getum betur metið og brugðist við hættu á smiti,“segir Baldur og bætir við ,,en eins og staðan er núna hafa öll COVID-19-smit sem hafa verið staðfest á Íslandi verið rakin til ferðalaga í útlöndum.“

Baldur segir starfsemina ganga sinn vangagang þótt ýmsar venjur hafi breyst síðastliðna daga, til dæmis varðandi sótthreinsun, handþvott og slíkt samkvæmt leiðbeiningum frá landlækni. „Við höfum sett sótthreinsandi vökva til handhreinsunar í öll útibú og aðrar starfsstöðvar og beint því til starfsfólks að forðast handabönd og slíkt í samræmi við tilmæli landlæknis.“

Þá segir hann Landsbankann vera með sérstaka viðbragðsáætlun vegna mögulegra fjöldaforfalla starfsfólks og fljótlega eftir að fréttir fóru að berast af COVID-19-faraldrinum var sú viðbragðsáætlun uppfærð.

„Við höfum skoðað ýmsa möguleika og erum tilbúin til að grípa til frekari aðgerða ef þess gerist þörf með litlum eða engum fyrirvara. Staðan er metin reglulega,“ segir Baldur.

Elín Gränz mannauðstjóri Hörpu segir vinnudaginn nú hefjast á sérstökum morgunfundum um mögulegar aðgerðir og viðbrögð til að fyrirbyggja smitleiðir.Vísir/Vilhelm

Harpa: Dagurinn hefst með sérstökum morgunfundum

Í Hörpu er ástandið metið alla daga þar sem öryggi viðskiptavina, starfsmanna og gesta er í algjörum forgrunni. „Við metum stöðugt ástandið og hefjum alla daga á sérstökum morgunfundum,“ segir Elín Gränz mannauðstjóri Hörpu. 

Meðal aðgerða segir Elín eru aukin þrif. „Í því sambandi höfum við aukið ræstingu í húsinu og sótthreinsun á búnaði sem notaður á viðburðum og á öllum flötum sem mikið eru snertir eins og handrið, handföng, lyftuhnappa og fleira,“ segir Elín og bætir við „Sótthreinsiefnum hefur verið komið fyrir bæði í almenningsrýmum og í bakhúsi ásamt leiðbeiningum um handþvott á snyrtingum.“

Elín segir ríka áherslu lagða á að miðla upplýsingum til allra viðeigandi aðila. 

„Við höfum lagt ríka áherslu á að miðla upplýsingum um það sem Harpa er að gera og hvetja til ábyrgrar hegðunar. ,,Við vinnum svo mjög náið með okkar viðskiptavinum að því að finna lausnir sem lágmarka neikvæð áhrif af ástandinu og reynum að gera það með þeim hætti að dæmið gangi upp fyrir alla aðila,“ segir Elín.

Þá hefur verið gripið til sérstakra aðgerða fyrir starfsfólk „Einnota hanskar eru í boði fyrir starfsfólk í framlínu og í mötuneyti en megináherslan er á undantekningarlausan handþvott.“    

Að sögn Elínar hefur ekki verið mikið um afbókanir á viðburðum en mikið er af fyrirspurnum vegna viðburða fram í tímann.

Elín Hjálmsdóttir framkvæmdastjóri Eimskips segir félagið hafa dregið úr ferðalögum og minnkað samgang á milli ólíkra vinnustöðva.Vísir/Eimskip

Eimskip: Minni samgangur á milli ólíkra vinnustöðva

Elín Hjálmsdóttir framkvæmdastjóri mannauðssviðs Eimskips segir viðbrögð félagsins stýrast nokkuð af því hvar starfsmenn starfa en alls starfa um 1800 manns í 18 löndum hjá félaginu. „Við fylgjum okkar viðbragðsáætlun, fundum daglega um málið til að meta stöðuna og grípum til viðeigandi aðgerða,“ segir Elín.

Aðgerðir miða allar að því að sýna ábyrgð og tryggja öryggi starfsmanna, lágmakara möguleg áhrif á starfsemina og viðskiptavini.

„Okkar fyrstu viðbrögð voru í kringum þann tímapunkt þegar veiran kemur upp í Kína þar sem við rekum fjórar skrifstofur,“ segir Elín og bætir við „Það leiddi meðal annars til þess að starfsmenn okkar í Kína þurftu að vinna heima tímabundið.“

Elín segir þessa starfsmenn nú komnir til baka á skrifstofur Eimskips. „En þó höfum við skipulagt það þannig að ekki komi allir tilbaka á sama tíma til að lágmarka áhættu.“

Elín segir miklu skipta að allir starfsmenn félagsins séu vel upplýstir um allan heim og að fyrirmælum sé fylgt eftir. „Hér á Íslandi höfum við lagt mikla áherslu á að miðla upplýsingum frá viðeigandi yfirvöldum til okkar starfsmanna um hvernig vinnubrögð skuli viðhafa og með hvaða hætti við getum sýnt ábyrgð í verki til að lágmarka áhættuna fyrir alla,“ segir Elín.

Þá hefur félagið dregið úr ferðalögum.

„Við höfum dregið úr ferðalögum starfsmanna eftir fremsta megni, aukið þrif og sótthreinsun á öllum okkar vinnustöðvum og lagt af fjölmenna fundi.“

Minni samgangur er einnig á milli ólíkra vinnustöðva og meira er um þrif.

„Við erum að auka þrif á tækjum við vaktaskipti og takmarka samgang á milli ólíkra vinnustöðva og hópa starfsmanna sem gegna hver um sig mikilvægu hlutverki í okkar starfsemi,“ segir Elín að lokum.

Halla Jónsdóttir mannauðs- og rekstrarstjóri Héraðsdóms Reykjavíkur segir mikilvægt að halda ró sinni og taka eitt skref í einu.Vísir/Héraðsdómur Reykjavíkur

Héraðsdómur Reykjavíkur:

Vatnsflöskur í stað vatnskanna í dómsölum

Halla Jónsdóttir mannauðs- og rekstrarstjóri Héraðsdóms Reykjavíkur segir að þar starfi fimmtíu manns en auk starfsmanna komi til þeirra fjöldi gesta daglega. Að hennar sögn er því mesta áherslan lögð á að gera allt sem í þeirra valdi stendur til að draga úr smitleiðum.

„Það gerum við meðal annars með því að leggja meiri áherslu á sótthreinsun við dagleg þrif, aðgengi sótthreinsibúnaðar fyrir starfsfólk og gesti og að skipta vatnskönnum í dómsölum út fyrir vatnsflöskur.“

Þá segir Halla mikla áherslu lagða á gott upplýsingaflæði til starfsfólks og gesta þar um þau tilmæli og leiðbeiningar sem berast frá Landlækni.

„Við erum með virkt samtal í gangi innan dómstólsins um það sem við getum gert til að fara varlega. Mikilvægast er að hver og einn einstaklingur sé meðvitaður og passi vel upp á sig og sýni öðrum tillitssemi,“ segir Halla og bætir við „Við höfum fundað um þetta og dreift upplýsingum um hvernig best sé að hegða sér. Hér eru allir að vanda sig.“

Þá segir Halla að starfsfólk sé hvatt til að vera í góðu sambandi við stjórnendur ef einkenni koma upp hjá því sjálfu eða í umhverfi þess. Þar sé miðað við að fylgja eftir tilmælum um viðbrögð við flensueinkennum og ferðum til áhættusvæða.

„Að lokum skiptir líka máli að halda ró sinni og taka eitt skref í einu. Yfirvöld eru dugleg að veita upplýsingar og við fylgjumst grannt með þeim og tökum stöðuna daglega,“ segir Halla.


Tengdar fréttir






Fleiri fréttir

Sjá meira


×