Atvinnulíf

Vinnustaðapartí: Upplifun makans skiptir máli

Rakel Sveinsdóttir skrifar
Sigurjón Þórðarson ráðgjafi hjá Capacent segir margt hafa breyst síðustu tuttugu árin þegar kemur að vinnustaðapartíum. Betur sé hugað að því en áður hvar, hvenær og hvernig er staðið að viðburðum.
Sigurjón Þórðarson ráðgjafi hjá Capacent segir margt hafa breyst síðustu tuttugu árin þegar kemur að vinnustaðapartíum. Betur sé hugað að því en áður hvar, hvenær og hvernig er staðið að viðburðum. Vísir/Vilhelm

Sigurjón Þórðarson ráðgjafi hjá Capacent segir vinnustaðapartí góð fyrir hópefli og liðsheild að því tilskildu að viðburðirnir fari vel fram og skilji gott eftir sig. Hann mælir með því að viðburðir fari fram á vinnutíma og segir mikilvægt að upplifun  makans sé ekki sú að vinnan sé að taka tíma fjölskyldunnar. Sigurjón segir margt hafa breyst síðastliðin tuttugu ár. „Mikið er spáð í afþreyinguna, staðsetningu, tímasetningar og veitingar. Ekki er algilt að boðið sé upp á áfengi en þó að það sé gert er það gjarnan í hófi,“ segir Sigurjón.

Um makalaus vinnustaðapartí sem hópefli segir Sigurjón „Vinnustaðapartí og viðburðir eru það sem hægt er kalla sameiginlega upplifun sem eitt af því sem getur styrkt strengi milli einstaklinga og er jákvætt í eðli sínu.

Til að svo megi verði þarf viðburðurinn að skilja eftir sig jákvæðni í huga þeirra sem þar voru. Skemmtunin þarf að fara vel fram, samskipti hafi verið jákvæð og ánægjuleg, helst þannig að þau hafi verið meiri en alla jafna á vinnutíma auk þess að allir komist heilir heim.“

Í umfjöllun Atvinnulífs á Vísi í dag hefur komið fram að prívattími fjölskyldu og para á undir högg að sækja. Sigurjón segir mikilvægt að taka tillit til fjölskyldunnar þegar staðið er fyrir makalausum vinnustaðapartíum:

„Það er mikilvægt að þegar starfsfólk kemur heim að upplifun maka sé ekki sú að verið sé að taka af sameiginlegum tíma fjölskyldunnar.“

Sigurjón segir margt hafa breyst á síðastliðnum tuttugu árum sem hann hefur starfað í ráðgjöf. Margir vinnustaðir séu nú með skýrari markmið um það hver tilgangurinn með vinnustaðapartíum er.

„Við höfum mikið lært á þessum tíma. Oft þótti nóg að splæsa í bjór og snakk og láta stemminguna mynda straum sem bar fólk eitthvað. Slíkt getur farið úrskeiðis sérstaklega ef ógætilega er farið,“ segir Sigurjón og bætir við ,,Nú er mikið algengara að lagt er upp með spurninguna, „Hvað ætlum við að fá út úr viðburðinum? ekki fjárhagslega, heldur ætlum við auka samskipti, læra eitthvað eða eiga góða stund saman.“

Í dag er ekki litið svo á að það sé bara hægt að slá saman í snakk og bjór ef ætlunin er að standa fyrir viðburði sem á að hrista saman hópinn.

„Mikið er spáð í afþreyinguna, staðsetningu, tímasetningar og veitingar. Ekki er algilt að boðið sé upp á áfengi en þó að það sé gert er það gjarnan í hófi. Margir vinnustaðir eru virkilega að vanda sig og vilja að upplifun allra verði góð með öryggið að leiðarljósi,“ segir Sigurjón.

Það er mikilvægt að þegar starfsfólk kemur heim að upplifun maka sé ekki sú að verið sé að taka af sameiginlegum tíma fjölskyldunnar.

Sigurjón segir vinnufélaga oft passa vel upp á hvort annað þegar hann er spurður um þær aðstæður sem víða skapast í vinnustaðapartíum þar sem einhver einn aðili verður of fullur.Vísir/Getty

Umhyggja er lykilorð hérna stjórnendur og þá gjarnan mannauðsstjórar eru að vinna ótrúlega gott starf sem er oft ekki sýnilegt. Leysa úr aðstæðum og flækjum sem koma upp. Ofneysla á áfengi er sannarleg eitt af því

Fulli karlinn og fulla kerlingin

Það kannast margir vinnustaðir við þetta: Einhver einn í samstarfshópnum á það til að drekka of mikið í hvert sinn sem staðið er fyrir vinnustaðapartíum. Skiptir þá engu máli hvort makar eru með eða ekki. Við spyrjum Sigurjón um það hvort honum finnist eitthvað hafa breyst í þessu og hvernig hægt sé að takast á við þessar aðstæður sem svo margir kannast við.

,,Umhyggja er lykilorð hérna stjórnendur og þá gjarnan mannauðsstjórar eru að vinna ótrúlega gott starf sem er oft ekki sýnilegt. Leysa úr aðstæðum og flækjum sem koma upp. Ofneysla á áfengi er sannarleg eitt af því, bæði eru dæmi um að fjarlægja viðkomandi út úr aðstæðunum, senda heim í leigubíl, svo er slíkt hegðun líka rýnd og tekin fyrir eftir samkomuna rædd við viðkomandi og farið í aðgerðir sem geta verið afsökunarbeiðnir, áminningar, meðferðir og allt þar á milli.

Vinnufélagar passa oft vel upp á hvort annað, hjálpa og aðstoða, engin vill að einhver valdi öðrum leiðindum eða skaða þar með talið sjálfum sér,“ segir Sigurjón.

En lumar þú á einhverjum ráðum í lokin fyrir stjórnendur og fyrirtæki að huga að?

,,Þegar þið haldið félagslega viðburði skoðið vel hvað þið viljið að sitji eftir. Leggið ykkur fram um að gera þetta vel, af umhyggju og góðum tilgangi. Setjið saman stund þar sem allir skemmta sér, fara ánægð heim og vakna með góðar minningar.“

Fjallað er um vinnustaða partí í Atvinnulífi á Vísi í dag.


Tengdar fréttir

Makalaus vinnustaðapartí geta valdið spennu í parasamböndum

Dæmi eru um að fólk hafi hætt störfum í kjölfar vinnustaðapartía og þá jafnvel í kjölfar þess að hafa brugðist trausti maka síns á slíkum viðburði. Ragnheiður Kr. Björnsdóttir hjónabandsráðgjafi hjá Lausninni segir vinnustaðapartí geta valdið spennu hjá hjónum og pörum.

Vinnustaðapartí: Fyrirtæki velt fyrir sér að hætta að bjóða upp á áfengi

Sú ,"brjálæðislega“ hugmynd hefur jafnvel komið upp hjá sumum fyrirtækjum að draga verulega úr eða láta alveg af því að bjóða upp á áfengi í vinnustaðapartíum segir Guðríður Sigríðardóttir ráðgjafi og einn eigandi Attendus. Þetta er í takt við það sem sjá má í umfjöllun erlendra miðla.






Fleiri fréttir

Sjá meira


×