Toyota reiknar með 80% samdrætti

Kristinn Ásgeir Gylfason skrifar 13. maí 2020 07:00

Toyota reiknar með að umtalsverður samdráttur verði í sölu á nýjum bílum og gerir ráð fyrir 80% samdrætti í hagnaði.

„Samdráttur í sölu mun verða meiri en í Lehman kreppunni, en vegna þess að við munum áfram skila hagnaði getum við fjárfest í framtíðinni,“ sagði Akio Toyoda, framkvæmdastjóri Toyota í viðtali við Financial Times.

Toyota áætlar að skila hagnaði sem nemur 20% af þeim hagnaði sem félagið skilaði í fyrra, sem var 2,4 trilljón japönsk jen eða um 3.277.147.513.286 íslenskar krónur. Sem væri slakasti árangur Toyota síðan árið 2011. Þá skýrðist dýfan af miklum jarðskjálfta og flóðbylgju.

Þá gerir Toyota ráð fyrir því að selja um 8,9 milljón bíla á heimsvísu en áætlanir gerðu ráð fyrir 10,5 milljónum. Við þessa tilkynningu lækkaði Toyota um tvö prósent í kauphöllinni í Tókýó.

Ekki bara Toyota sem spáir samdrætti

Honda skilaði umtalsverðu tapi á síðasta ársfjórðungi eftir að sala minnkaði umtalsvert í kjölfar kórónaveirunnar.

Mazda sendi frá sér afkomuviðvörun og gerir ráð fyrir að tekjur muni dragast saman um 81% vegna kórónaveirunnar.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.