Kínverskur viðskiptajöfur vill eignast New York Times

Kínverski viðskiptajöfurinn Chen Guangbiao vill eignast bandaríska dagblaðið New York Times.

Guangbiao vill meina að Sulzberger fjölskyldan, aðaleigendur blaðsins, eigi að lokum eftir að gefa sig fyrir rétt verð.

Þetta gaf Guangbiao út í fjölmiðlum á gamlársdag en hann mun eiga fund með ráðandi hluthöfum þann 5. janúar.

Arthur Sulzberger, stjórnarformaður New York Times, hefur ávallt haldið því fram að blaðið sé alls ekki til sölu.

„Það er hægt að fjárfesta í öllu, bara fyrir rétt verð,“ sagði Chen Guangbiao í samtali við Reuters.

Guangbiao er metinn á 740 milljónir Bandaríkjadali eða 85 milljarða íslenskra króna en hann mun vera kominn í samstarf við ónafngreindan fjárfestir frá Hong Kong og ætla þeir að bjóða einn milljarð Bandaríkjadala í félagið. Það samsvarar 115 milljörðum íslenskra króna. 

Guangbiao er þekktur í heimalandinu fyrir að stíga á stokk í fjölmiðlum með allskyns hugmyndir en margir vilja meina að hann geri það aðeins til að vekja athygli á sjálfum sér.