Heimsmarkmiðin

Ungt fólk í brenndepli á degi mannréttinda

Heimsljós kynnir
Sameinuðu þjóðirnar beina athyglinni að þátttöku ungs fólks í mannréttindamálum. Mynd: SÞ
Sameinuðu þjóðirnar beina athyglinni að þátttöku ungs fólks í mannréttindamálum. Mynd: SÞ

Í dag, á alþjóðlegum degi mannréttinda, heiðra Sameinuðu þjóðirnar ungt fólk með átaki sem hefur yfirskriftina „Ungt fólk rís upp í þágu mannréttinda.“ António Guterres aðalframkvæmdastjóri Sameinuðu þjóðanna segir í yfirlýsingu að samtökin fagni mikilvægu hlutverki ungs fólks við að gæða mannréttindi nýju lífi.



„Ungt fólk um allan heim gengur fylktu liði, skipuleggur sig og lætur í sér heyra um réttinn til heilbrigðs umhverfis, um réttindi kvenna og stúlkna, um réttinn til að taka þátt í ákvörðunum og fyrir tjáningarfrelsi. Það fylkir liði um réttinn til að lifa í friði, fyrir réttlæti og fyrir jöfnum tækifærum,” segir Guterres.



Samkvæmt frétt Upplýsingaskrifstofu Sameinuðu þjóðanna (UNRIC) verður í dag kastljósi beint að ungu fólki sem jákvæðu breytingaafli og leitast verður við að láta raddir þeirra heyrast og virkja sem flesta í þágu verndar réttinda. Átakinu er ætlað að efla og hvetja ungt fólk og sýna hvernig ungt fólk um allan heim hefur risið upp í þágu réttinda og barist gegn kynþáttahatri, hatursorðræðu, einelti, mismunun og loftslagsbreytingum, svo dæmi séu nefnd.



Á næstu tveimur vikum beinir átakið, sem er á vegum embættis Mannréttindastjóra Sameinuðu þjóðanna, kastljósinu að forystuhlutverki unga fólksins til að gefa röddum þeirra meira vægi og sýna hvernig það starfar í þágu mannréttinda.



„Það er mjög viðeigandi að við skulum halda upp á mannréttindaginn meðan loftslagsráðstefnan í Madríd ræðir réttlæti í loftslagsmálum,” segir Michelle Bachelet Mannréttindastjóri Sameinuðu þjóðanna. „Við eigum milljónum barna, unglinga og ungmenna skuld að gjalda. Þau hafa risið upp og látið sífellt meira í sér heyra um þá vá sem jörðin stendur frammi fyrir. Þetta unga fólk er réttilega að benda á að það er framtíð þeirra sjálfra sem er í veði og framtíð ófæddra kynslóða.”

Samkvæmt tölum Sameinuðu þjóðanna eru 1,2 milljarðar jarðarbúa á aldrinum 15-24 ára eða sjötti hver einstaklingur. Fleiri unglingar og ungmenni eru nú á lífi en nokkru sinni fyrr í sögu mannsins. Í frétt UNRIC segir að unga fólkið sé almennt betur menntuð og heilbrigðara en nokkru sinni og það hafi betri aðgang að tækni og upplýsingum – sem nýta megi í þágu mannréttinda. 



Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.

Tengd skjöl




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.