Alla jafna fara áhættuatriði sem þessi fram í þeim tilgangi að búa til bíómyndir. Þá er búið að áhættumeta allt og setja ökumann í fimm punkta belti og setja veltibúr í bílinn. Ekkert svoleiðis var til staðar þegar þessi Toyota Camry sveif yfir kyrrstæða bíla á bílastæði í Flórída á dögunum.

Camry-inn kom af hraðbraut 19 og sveif yfir bíla við Ford umboð. Ökumanninn svimaði og hann missti stjórn með þeim afleiðingum að hann fór út af og yfir grashól sem sendi hann í loft upp eins og sjá má á meðfylgjandi myndbandi.

Camry-inn hafnaði að lokum á kyrrstæðum bílum. Flugferðinni lauk þar með. Sem betur fer slasaðist enginn við atvikið. Ökumanninum var eðlilega brugðið en atvikið varð vegna einhvers líkamlegs ástands sem ekki hefur verið skýrt nánar.

Heildarvegalengdin sem Camry-inn sveif var um 42 metrar eða um sex metrum lengra en fyrsta flug Wright-bræðra árið 1903.