Viðskipti erlent

Google greiðir sekt fyrir að safna persónuupplýsingum um börn

Kjartan Kjartansson skrifar
Joe Simons, forstjóri Alríkisviðskiptastofnunar Bandaríkjanna, kynnti sáttina á blaðamannafundi í Washington-borg í dag.
Joe Simons, forstjóri Alríkisviðskiptastofnunar Bandaríkjanna, kynnti sáttina á blaðamannafundi í Washington-borg í dag. AP/Andrew Harnik
Tæknirisinn Google hefur samþykkt að greiða rúmlega 21 milljarðs króna sekt í Bandaríkjunum vegna ásakana um að fyrirtækið hafi safnað persónuupplýsingum um börn í gegnum myndbandavefinn Youtube án samþykkis foreldra þeirra.

Bandarísk lög banna fyrirtækjum að safna og deila persónuupplýsingum um börn yngri en þrettán ára án samþykkis foreldra þeirra. Google er engu að síður sakað um að hafa beint myndböndum á Youtube sérstaklega að börnum og nýtt vinsældir þeirra á meðal barna til að selja auglýsendum þjónustu sína.

Google viðurkenndi ekki sök en féllst á að greiða 136 milljónir dollara, jafnvirði rúmra sautján milljarða íslenskra króna, í sekt til Alríkisviðskiptastofnunar Bandaríkjanna (FTC) auk 34 milljóna dollara, jafnvirði rúmra fjögurra milljarða króna til New York-ríkis sem einnig rannsakaði ásakanirnar, að sögn AP-fréttastofunnar.

Réttindasamtök barna gagnrýna engu að síður að sektin sé alltof lág til að hafa áhrif á Google. Alphabet, móðurfyrirtæki Google, hagnaðist þannig um tæpan 31 milljarð dollara í fyrra, aðallega í gegnum auglýsingar sem eru sérsniðnar að notendum.

Með sáttinni lofar Google að afla staðfests samþykkis frá foreldrum barna áður en fyrirtækið safna eða deilir persónuupplýsingum um börn þeirra og að nota ekki þær upplýsingar frekar sem það hefur þegar aflað.






Fleiri fréttir

Sjá meira


×