Harmageddon

Telur borgina þurfa að koma með innlegg í kjaraviðræður

Frosti Logason skrifar

Eyþór Arnalds borgarfulltrúi Sjálfstæðisflokks segir alltof lítið hafa verið gert síðustu átta ár til að undirbúa hagstætt húsnæði í Reykjavík. Það aðgerðarleysi hafi svo átt sinn þátt í þeirri stöðu sem nú er upp komin í kjaraviðræðu launafólks að hans mati. 

Hann ræddi þetta mál í útvarpsþættinum Harmageddon í morgun. Eyþór sagði það húsnæði sem hafi verið byggt í borginni vera alltof dýrt og henti þannig einungis litlum hluta eftirspurnarinnar. 

„Síðan er hitt sem gleymist að Reykjavíkurborg tekur meiri launaskatt heldur en ríkið, er með hæsta útsvarskatt sem hægt er að hafa, en hann er yfir 14%, og er tekin af fyrstu krónu, það er engin persónuafsláttur,“ sagði Eyþór. 

Eyþór taldi vel hafa farið á því ef verkalýðsfélögin hefðu líka fundað með sveitarfélögum þegar þau voru í viðræðum við ríki nú á dögunum. Sagði hann langstærsta sveitafélagið, Reykjavíkurborg, bera mikla ábyrgð á því hvað kæmi út úr launaumslagi borgarbúa.

„Við teljum að Reykjavíkurborg geti lækkað útsvarið, geti farið betur með peninga, og bara skilið aðeins meira eftir í buddunni. Þessi tvö mál, hagstætt húsnæði og lækkun launaskatts í Reykjavík, þetta er eitthvað sem Reykjavíkurborg á náttúrlega að koma með og við undrumst þá þögn sem er um þátt sveitarfélaganna í þessu máli.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.



Velkomin á Vísi. Þessi vefur notar vafrakökur. Sjá nánar.