Súperstjörnufyrirtæki bað um Gylfa og Aron

„Við föngum ekki stundina, við búum hana til,“ segir í kynningu um viðburðafyrirtækið CMN sem sér um landsleik Íslands og Perú sem fram fer á Red Bull vellinum í Harrison, New Jersey þann 27. mars. CMN er eitt stærsta viðburðafyrirtæki heims, stofnað af Henry Cárdenas árið 2002. Það hefur alltaf haft það að markmiði að koma með það besta frá spænskumælandi heimi til Bandaríkjanna. Íþróttadeildin hefur séð um skipulagningu á leikjum argentínska landsliðsins í Bandaríkjunum þar sem flestir af bestu knattspyrnumönnum heims leika, meðal annar Lionel Messi.

Yfir 100 manns vinna hjá fyrirtækinu en það er með skrifstofur í Chicago og Miami. Skrifstofan sér um tónleikahald og íþróttaviðburði og kappkostar að bjóða það besta frá spænskumælandi heiminum til Bandaríkjamanna. Meðal stórstjarna sem eru á samningi hjá fyrirtækinu er tónlistarfólkið Marc Anthony, Shakira, Juan Luis Guerra, Chayanne, Maná, Nicky Jam og Daddy Yankee sem rappaði sig inn í hjörtu heimsins í laginu Despacito.

Ferðin mun ekki kosta KSÍ mikla peninga ef nokkra samkvæmt Ómari Smárasyni, markaðsstjóra KSÍ.

„Þetta er ekkert nýtt að viðburðafyrirtæki sjái um vináttuleiki, sérstaklega ef þeir fara fram í þriðja landinu eins og er í þessu tilviki. Leikurinn er ekki spilaður í Perú eða á Íslandi heldur í Bandaríkjunum. Landslagið er orðið gjörbreytt sem kemur með þeim árangri sem við höfum verið að ná. Það vilja fleiri lið spila við okkur og við erum orðinn stærri biti en við vorum,“ segir hann.



Karlalandsliðið fór í boðsferð til Katar seint á síðasta ári þar sem liðið spilaði tvo leiki og naut lífsins. Sú ferð, sem og ferðin til Indónesíu, kostar KSÍ varla nema þrjár krónur og tíu aura.

„Það er jákvætt fyrir KSÍ og okkur sem fótboltaland að við erum orðin stærri biti. Ég veit ekki alveg hvernig kostnaðinum er skipt en við erum ekki að bera mikinn kostnað af þessu ef einhvern,“ segir Ómar.