Viðskipti erlent

Ryanair birtir myndband sem það segir sanna sviðsetningu

Stefán Ó. Jónsson skrifar
Í myndbandinu má sjá fólkið leggjast á gólfið og standa svo upp aftur þegar búið er að taka myndina frægu.
Í myndbandinu má sjá fólkið leggjast á gólfið og standa svo upp aftur þegar búið er að taka myndina frægu. Skjáskot

Lággjaldaflugfélagið Ryanair hefur birt upptöku úr öryggismyndavél sem sýnir áhafnarmeðlimi félagsins sviðsetja ljósmynd sem vakti mikla athygli í netheimum í upphafi vikunnar.

Á myndinni, sem Vísir greindi frá á sínum tíma, mátti sjá flugþjóna- og freyjur liggjandi á gólfinu á flugvelli í Malaga á Spáni. Áhöfnin var sögð föst á flugvellinum vegna veðurs og var Ryanair gagnrýnt fyrir að veita starfsfólki sínu ekki betri aðbúnað.

Sjá einnig: Mynd af áhöfn Ryanair reitir netverja til reiði

Eftir að myndin fór í dreifingu sendi Ryanair frá sér yfirlýsingu þar sem félagið hélt því fram að myndin væri sviðsett. Ryanair bætti svo um betur í gær þegar það birti myndband á Twitter-síðu sinni sem virðist tekið úr öryggismyndavél herbergisins þar sem áhöfnin dvaldi. Í myndskeiðinu má sjá áhafnarmeðlimina sex standa upp úr sætum sínum og leggjast á gólfið.

Eftir að kollegi þeirra hefur dregið upp síma sinn og tekið mynd af þeim á gólfinu stendur fólkið upp aftur og gengur út eða aftur til sæta sinna. Myndbandið má sjá hér að neðan en flugfélagið segir það sanna að hin fræga ljósmynd sé sviðsett.



Netverjar voru þó ekki tilbúnir að fyrirgefa flugfélaginu. Jim Atkinsson, sá sem fyrstur birti umrædda ljósmynd á Twitter, var fljótur að svara tísti Ryanair. Í svari sínu sagði hann augljóst að myndin hafi verið tekin í mótmælaskyni. Eftir stæði að áhafnarmeðlimirnir hefðu verið strandaglópar á flugvellinum yfir nóttina og að Ryanair hafi ekki reynt að létta þeim lífið.

Aðrir netverjar spurðu sig hvort flugfélaginu þætti ásættanlegt að áhafnir Ryanair þyrftu að verja nóttinni á stólum, sem vart getur talist þægilegt til lengdar. Þá settu aðrir stórt spurningarmerki við það að flugfélag væri að leka upptökum úr öryggismyndavélum til að klekkja opinberlega á starfsmönnum sínum.

Enn aðrir sögðu að myndbandið sýndi fram á að Ryanair hefði brugðist enn fleiri starfsmönnum sínum en upphaflega var talið. Heildarfjöldi þeirra væri ekki 6, eins og sjá má á myndinni, heldur 24 - átta flugmenn og 16 flugfreyjur og þjónar - eins og sést í myndbandinu.

Þegar veðrinu slotaði var starfsmönnum Ryanair að endingu flogið til Portúgal. Þar þurftu þeir að bíða um borð í vél félagsins í þrjár klukkustundir því sækja þurfti flugmann til Lundúna til að flytja fólkið aftur til síns heima. 

Myndina sem olli öllu fjarðafokinu má sjá hér að neðan.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
SIMINN
2,79
23
428.425
EIM
1,09
6
15.650
TM
0,77
2
4.573
MAREL
0,51
14
430.537
SYN
0,36
1
3.474

Mesta lækkun dagsins


Félag
Br.%
Fjöldi
Velta*
VIS
-2,54
4
1.619.144
ICEAIR
-1,48
11
59.944
KVIKA
-1,36
10
84.287
ICESEA
-1,1
7
29.031
EIK
-1,02
1
12
Velkomin á Vísi. Þessi vefur notar vafrakökur. Sjá nánar.