Ótrúlegur bati Hetju: Gat ekki staðið í átján daga

Folaldið Hetja er komið aftur heim á bæinn Hof í Vatnsdal eftir að hafa dvalið í um þrjá mánuði hjá dýralækni, í kjölfar þess að hafa verið föst í holu í um tvo sólarhringa í ágúst. Folaldið var illa slasað og var á tímabili tvísýnt hvort það myndi lifa af.

Dýralæknirinn Ingunn Reynisdóttir á Syðri-Völlum í Miðfirði birti magnaðar myndir og myndbönd af folaldinu, sárum þess og frá heimsókn eigendanna.

Eline Manon Schrijver á bænum Hofi segir í samtali við Vísi að fólkið á bænum hafi tekið eftir því í lok ágúst að merin Þyrla hafi verið ein á ferli í hlíðum fjallsins. Þetta hafi þótt undarlegt þar sem hún væri vanalega á ferð með folaldi sínu. Nokkurn tíma tók þar til að Þyrla leiddi þau að svæðinu þar sem Hetja fannst í holunni. Með hjálp góðra manna tókst svo að lokum að grafa Hetju upp.

Með lungnabólgu, háan hita og ígerð

Nokkrum dögum síðar ákváðu eigendurnir að fara með folaldið til Ingunnar þegar það var orðið mjög veikt. „Með lungnabólgu, háan hita og feiknarlega mikla ígerð í öllum fótum. Lá hún milli heims og helju í 5 sólarhringa en allan tímann tíndi hún upp í fóður og drakk með hjálp. Fyrst eftir 18 sólarhringa var hún orðin það hress að hægt svar að hjálpa henni á fætur og gat hún staðið í nokkrar mínútur þann daginn. Húðin sérstaklega á framfótum datt af og réttisinin á vinstra framfæti gaf sig vegna ígerðarinnar. Hún þurfti því tíð umbúðaskipti og var með spelku í 2 mánuði. Allan tímann var hún eins og ljós, lá og lét gæla við sig á meðan skipt var um umbúðir sama hversu sársaukafullt þetta var,“ segir Ingunn.

Nú þremur mánuðum eftir að Hetja fannst í holunni er hún komin aftur heim á Hof þar sem hún hleypur út um allt. „Ótrúlegt hvað þessar skepnur okkar eru lífseigar og hvað hægt er að græða,“ segir Ingunn í færslu sinni.

Sjá má myndirnar og myndböndin að neðan.