Lífið

Er skrefinu nær því að finna föður sinn eftir 10 ára leit

Sylvía Rut Sigfúsdóttir skrifar
Linda Rut Sigríðardóttir hefur leitað að föður sínum í rúman áratug, án árangurs.
Linda Rut Sigríðardóttir hefur leitað að föður sínum í rúman áratug, án árangurs.
Önnur þáttaröð af Leitinni að upprunanum hófst á Stöð 2 á sunnudag, en sú fyrri vakti mikla athygli og sópaði að sér verðlaunum. Í þessum fyrsta þætti var ótrúleg saga Lindu Rutar Sigríðardóttur sögð, en hún komst að því 17 ára gömul að maðurinn sem hún taldi vera föður sinn væri það ekki, heldur væri hún í raun dóttir Breta sem hvarf á dularfullan hátt frá Súðavík fyrir nærri 30 árum.

Hér að neðan má sjá brot úr þessum fyrsta þætti sem hélt áhorfendum límdum fyrir framan skjáinn. Í brotinu er rætt við Sigríði R. Jónsdóttur móður Lindu og Lindu sjálfa sem segir frá því þegar hún varð sú yngsta sem bjargaðist á lífi eftir snjóflóðið örlagaríka í Súðavík þann 16. janúar árið 1995, þá fimm ára gömul. 

Snjóflóðið á Súðavík í janúar 1995 var rúmlega 200 metra breytt en það féll klukkan 06:25 á miðja byggðina. Flóðið tók 14 mannslíf, þar á meðal átta börn en 12 var bjargað. Húsin sem flóðið féll á stóðu flest utan þeirra marka sem skilgreind voru sem hættusvæði vegna snjóflóða.
17 mánaða systir Lindu var eitt barnanna sem lést í flóðinu en í myndskeiðinu hér fyrir neðan má sjá upptöku af henni á aðfangadag, þremur vikum fyrir flóðið. 

Linda Rut Sigríðardóttir var sú yngsta af þeim tólf sem fundust á lífi eftir snjóflóðið örlagaríka en það var leitarhundurinn Hnota sem fann hana.
Linda hefur leitað að föður sínum í rúman áratug, án árangurs. Í þættinum á sunnudag náði hún hins vegar að komast skrefinu nær því að finna hann því með hjálp tveggja Breta fannst fæðingarvottorð hans. Upplýsingarnar sem komu fram á því opnuðu nýja möguleika til leitar og þeim tókst að finna tveggja ára gamalt heimilisfang hans í strandbænum Weymouth.

Í næsta þætti sem sýndur verður á sunnudag á Stöð 2 fáum við að heyra meira um leit hennar. Linda og Sigrún Ósk Kristjánsdóttir, umsjónarmaður þáttanna, fóru til Bretlands til að freista þess að finna manninn.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.