Þær íslensku slógu öll met

Íslensku konurnar slógu öll met. Af samtals 40 konum sem tilnefndar voru til verðlauna frá ýmsum löndum voru sex íslenskar og fimm þeirra hlutu verðlaun, þar af ein aðalverðlaunin. Ef miðað væri við hina frægu höfðatölu þjóða hefðu Bretar átt að tilnefna 1.000 konur og Ítalir annað eins.“

Þetta segir Elinóra Inga Sigurðardóttir, formaður Kvenn, sem er Íslandsdeild alþjóðasamtaka uppfinninga og frumkvöðlakvenna (Global Women Inventors and innovators Network; skammstafað GWIIN). Hún er nýkomin af ráðstefnu og verðlaunaveitingu samtakanna í Bari á Ítalíu.

„Bari er yndislegur strandbær út við Adríahafið, skammt frá Róm, þar voru konur frá ýmsum löndum og má nefna Bretland, Ítalíu, Taíland, Malasíu og Finnland og var mjög gaman. Verðlaun voru veitt í mismunandi flokkum nýsköpunar, frá hönnun upp í flóknar vísindalegar stúdíur.“

Mestan ljóma segir Elinóra stafa af aðalverðlaununum sem Sandra Mjöll Jónsdóttir fékk fyrir nýsköpun sína sem snýst um að nota blóðvökva til að rækta stofnfrumur í.

„Blóðvökvann fær Sandra Mjöll hjá Blóðbankanum en hingað til hefur honum verið hent. Stofnfrumumeðferðum í lækningaskyni fer fjölgandi í heiminum og hingað til hefur verið notaður dýravökvi til að rækta frumurnar í. Sandra Mjöll ver doktorsritgerð sína um verkefnið í september og ég spái því að hún eigi eftir að verða heimsfræg.“

Elinóra lýsir öllum verkefnum verðlaunahafanna stolt. Byrjar á Biodome Reykjavik sem Hjördís Sigurðardóttir skipulagsfræðingur stendur fyrir. „Hjördís er búin að fá lóð inni í Elliðaárdal, þar ætlar hún að reisa byggingu með hvolfþaki fyrir ræktun og ráðstefnur. Margrét Júlíana Sigurðardóttir tónlistarkona er höfundur músíkmúsarinnar Maximúsar, nú hefur hún þróað tölvuleik sem hjálpar fólki að læra nótur á skemmtilegan hátt.

Listakonan Sigrún Lára Shanko fékk verðlaun fyrir hönnun sína á gólf- og veggteppum sem hún vinnur í þrívídd með flosnál að vopni og bæta hljóðvist húsa. Þorbjörg Jensdóttir, doktor í næringarvísindum, stendur á bak við Hap+ töflurnar sem auka munnvatnsframleiðslu 20-falt, án þess að eyða glerungi tanna og Hildur Magnúsdóttir þurrkar og malar lambalifur og setur í belgi. Þar er ný afurð komin á markað.“

Íslandsdeildin Kvenn verður tíu ára þann 11. þessa mánaðar. Elinóra stóð fyrir stofnun hennar og kveðst hingað til hafa tilnefnt 59 íslenskar konur til viðurkenninga. „En okkur hefur aldrei gengið eins vel og núna. Það var yndislegt að upplifa það.“