Glamour

iglo+indi gerir peysu til styrktar UN Women

Ritstjórn skrifar
PIPAR\TBWA og DÓTTIR gáfu vinnu sína við undirbúning átaksins auk þess sem hljómsveitin East of my Youth lánaði átakinu lagið Stronger.
PIPAR\TBWA og DÓTTIR gáfu vinnu sína við undirbúning átaksins auk þess sem hljómsveitin East of my Youth lánaði átakinu lagið Stronger.
Íslenska barnafatamerkið iglo+indi hefur hannað peysu fyrir bæði börn og fullorðna í samstarfi við landsnefnd UN Women á Íslandi. Um er að ræða peysu með lógóinu empwr en þetta er í fyrsta sinn sem iglo+indi hanna einnig flík fyrir fullorðna.

Prent peysunnar er unnið úr mynstri sprottið frá Kamerún þar sem UN Women starfrækja griðastaði fyrir konur á flótta en ágóði peysunnar rennur til styrktar reksturs griðastaða UN Women. 

Aldrei hafa fleiri verið á flótta í heiminum og nú en um 65 milljónir manna eru á flótta eða á vergangi þar af helmingur konur. Þær eru sérstaklega berskjaldaðar fyrir ofbeldi og mansali en oftar en ekki eru atvinnutækifæri kvenna á flótta af skornum skammti.

Empwr peysan fæst í verslunum iglo+indi og á www.igloindi.com. Verð fyrir barnapeysu: 5.990 kr. / Verð fyrir fullorðinspeysu: 8.990 kr.

UN Women starfrækir griðastaði fyrir konur á flótta víða um heim, þar á meðal í Kamerún, Austur-Kongó, Serbíu, Makedóníu, Jórdaníu og Írak. Þar gefst þeim kostur á að vinna, stunda hagnýtt nám í tungumálum, tölvuvinnslu, klæðskurði og saumaskap, viðskiptaáætlanagerð og bókhaldi. Um leið hljóta þær félagsskap og jafningjastuðning hver af annarri en margar þeirra glíma við félagslega einangrun.

Griðastaðirnir eru grundvöllur fjárhagslegrar valdeflingar kvenna þar sem konum býðst einnig að fá smærri lán til eigin reksturs og koma undir sig fótunum til lengri tíma. Á griðastöðunum hljóta konurnar áfallahjálp og sálrænan stuðning auk þess sem þeim er gert kleift að finna kraft, von og gleði á ný.

Í tilefni af empwr peysunni og krafti kvenna halda iglo+indí og UN Women á Íslandi í empwr partý á Geira Smart í dag, 1. júní kl.17. empwr peysan verður seld á staðnum, léttar veitingar í boði og Sunna Ben þeytir skífum. Svo spáir meira að segja sól – allir eru hjartanlega velkomnir! 






Velkomin á Vísi. Þessi vefur notar vafrakökur. Sjá nánar.