107 sm lax á land á Jöklusvæðinu

Jökla er komin á yfirfall fyrir nokkru en samkvæmt fréttum frá leigutakanum Strengjum er ennþá veitt í hliðaránum á svæðinu.

Árnar sem renna í Jöklu eru til dæmis Kaldá, Fögruhlíðará og Laxá og í þeim má oft gera fína veiði þegar Jökla sjálf verður óveiðandi.  Sem dæmi hefur oft verið fín sjóbleikjuveiði í ósum Fögruhlíðarár seint á tímabilinu og er það viðbót við laxinn sem gengur í hana og staðbundna urriðann sem heldur sig í hyljum hennar.  Það sjást oft stórir laxar í Jöklu sjálfri og laxar um meter veiðast á svæðinu á hverju ári en í gærkvöldi veiddist klárlega stærsti lax sem veiðst hefur á svæðinu til þessa.

Veiðimaðurinn Guttormur Pálsson frá Egilsstöðum var veið veiðar í ánum og hafði 9 laxa upp úr krafsinu og gerði sér lítið fyrir og lauk veiði í kvöld með stærsta laxi í sögu Jöklusvæðisins.  Laxinn veiddi hann í Laxá í veiðistaðnum Efri Brúarbreiða og mældist laxinn 107 sm langur og 53 sm í ummál.  Laxinn fór í klakkistu eftir að hafa verið myndaður í bak og fyrir. Veiðinni lýkur á svæðinu næsta laugardag og veiðitölurnar úr Jöklu og Hliðarám stóðu í 332 löxum síðasta miðvikudag en nýjar tölur verða uppfærðar á heimasíðu Landssambands Veiðifélaga í kvöld.