Bílgreinasambandið gengur til liðs við Samtök iðnaðarins

Aðalfundur Bílgreinasambandsins fór fram í gær á Grand Hótel Reykjavík.  Á fundinum var samþykkt af félagsmönnum að ganga til liðs við Samtök iðnaðarins. Bílgreinasambandið var stofnað árið 1970 en félagsmenn þess eru yfir 130 fyrirtæki sem starfa í bílgreininni. Jón Trausti Ólafsson var endurkjörinn formaður félagsins til næstu 2ja ára en Jón Trausti hefur verið formaður frá árinu 2013.

Bílgreinasambandið verður sjálfstæð eining innan Samtaka iðnaðarins með eigin stjórn, framkvæmdastjóra og fjárhag. ,,Við höfum lagt mikla vinnu í að skoða hvernig við getum eflt okkar starf. Menntamálin brenna á okkur og við viljum auka nýliðun í greininni, enda er bílgreinin mjög spennandi kostur fyrir ungt fólk að starfa í þar sem endurmenntun er mikil og laun eru góð.

Við teljum að á þessum tímapunkti sé rétt fyrir okkur að hefja samstarf við Samtök iðnaðarins og sjáum margvíslegan styrk falin í þeim samtökum sem við teljum að geti lagt okkur lið," segir Özur Lárusson sem er framkvæmdastjóri Bílgreinasambandsins. ,,Bílgreinasambandið eru öflug samtök og við sjáum fyrir okkur að þau verði fjórða stoðin innan Samtaka iðnaðarins, en hinar þrjár stoðirnar eru framleiðslu-, mannvirkja-, og hugverkasvið.

Það eru margvísleg samlegðaráhrif af komu Bílgreinasambandsins og við lítum svo á að koma Bílgreinasambandsins inn í Samtök iðnaðarins styrki starf okkar enn frekar," segir Almar Guðmundsson, framkvæmdastjóri Samtaka iðnaðarins.