Berst við írska strauma

Guðni Páll Viktorsson er rúmlega hálfnaður í kajakróðri sínum í kringum Írland. Ferðin hefur tekið lengri tíma en áætlað var vegna vályndra veðra og óhentugra strauma en hann vonast til að klára á næstu tveimur til þremur vikum.

Guðni Páll og þrír félagar hans, Breti og tveir Írar, lögðu af stað 5. júní frá Kinsale, skammt frá Cork. Nú fjórum vikum síðar eru þeir komnir til Portnablagh en hafa setið þar fastir í tvo daga vegna veðurs. Raunar hefur kvarnast úr hópnum þar sem einn félaga hans þurfti að hætta vegna meiðsla.

Guðni Páll hefur lengi stundað kajakróður og reri einn í kringum Ísland fyrir fjórum árum. Hann segir þó mun erfiðara að róa í kringum Írland. „Ferðin hefur gengið mun hægar en við áætluðum. Aðallega vegna veðurs en svo eru straumarnir hér allt öðruvísi en á Íslandi. Hérna getum við nánast eingöngu róið með réttu falli (með strauminn með okkur) og því höfum við stundum bara 6 til 7 tíma á dag til að róa. Heima getur maður róið í 10 til 12 tíma án vandræða,“ útskýrir Guðni Páll. Nú eru þeir félagar að nálgast vesturströnd Írlands og þá vonast þeir eftir sunnanvindi í bakið.

Guðni Páll segir Írland afar fallegt land og heillandi fyrir kajakfólk. Veðrið hefur á tímum leikið við þá félaga og ferðin í heild verið mjög ánægjuleg þrátt fyrir ýmsa erfiðleika og erfitt sjólag á köflum. „Fyrir nokkrum dögum fengum við höfrungasýningu í þrjú korter á meðan við vorum að róa og það var frábær upplifun. Svo er landslagið hérna algjörlega magnað.“

Hann segir Íra afar gestrisna. „Það er sama hvert við komum, maður upplifir sig velkominn og allir eru tilbúnir að gera allt fyrir okkur.“

Kajakróður er án efa afar krefjandi líkamlega en hvernig er andlega hliðin? „Þetta hefur vissulega tekið mikið á líkamlega og maður er farinn að finna fyrir þreytu og stirðleika alls staðar. En það er ekkert miðað við andlega hlutann. Ég hef oft þurft að berjast við sjálfan mig bara til að halda haus. Ég vissi fyrir þessa ferð að þetta yrði mjög erfitt, en að vera burtu frá fimm mánaða dóttur minni er það erfiðasta sem ég hef gert hingað til,“ segir Guðni Páll en tekur fram að hann eigi gott fólk heima fyrir sem geri honum lífið léttara með hjálp tækninnar.

Þeir félagar vonast til að geta lagt aftur af stað fljótlega og búast við að klára hringinn á tveimur til þremur vikum ef allt gengur upp.

Guðni Páll nýtir átakið til vekja athygli á starfi Umhyggju, félagi langveikra barna. Þeir sem vilja styrkja sjóðinn með framlögum geta lagt inn á eftirfarandi reikning: Reikningur: 0101-15-371646 Kennitala: 691086-1199