Steindi Sr. er gríðarlegur Kardashian aðdáandi og getur sleikt á sér nefið

Steinþór Steinþórsson, faðir, Steinda Jr., er gríðarlega mikill aðdáandi Kardashian-fjölskyldunnar og missir ekki af þætti af Keeping Up With the Kardashian´s sem sýndir eru á sjónvarpsstöðinni E!

„Ég er nú þokkalega inn í öllum sem kemur að Kardashian fjölskyldunni,“ sagði Steinþór Steinþórsson, í FM95BLÖ á föstudaginn. Kim Kardashian setti inn nektarmynd af sér á samfélagsmiðla í síðustu viku og vakti hún gríðarlega athygli.

„Þetta er bara svo gott fólk. Ég skil bara ekki af hverju fólk er eitthvað að hneykslast á þessari mynd, mér finnst þetta bara vera list og bara rosalega flott hjá henni. Þessi mynd er enginn nekt, bara list.“

Steinþór er mjög harður aðdáandi og stendur ávallt við bakið á sínu fólki. Kim Kardashian er í dag gift rapparanum Kanye West sem hefur einnig verið mikið í fjölmiðlum undanfarið og þá aðallega fyrir það að hafa tapað gríðarlega miklum fjármunum á tískufyrirtæki sínu.

„Ég held að hann sé nú eitthvað að skíta á sig þessi Kanye. Hann er alltaf með einhverjar yfirlýsingar sem ég er ekki alveg að skilja,“ segir Steindi Sr. en hver er hans uppáhalds meðlimur í Kardashian fjölskyldunni?

„Scott hefur alltaf verið minn uppáhalds,“ segir hann en Scott Disick er kærasti Kourtney Kardashian og hafa þau gengið í gegnum erfiða tíma.

„Við aðdáendurnir erum nú að vona að þetta gangi nú upp hjá þeim og erum bara að vona það besta og þeirra samband gangi upp. Mér finnst þetta bara mjög skemmtilegir þættir og sýnir raunveruleikann sem þau búa við.“

Steinþór eldri hefur einnig leyndan hæfileika en hann getur sleikt á sér nefið með tungunni eins og sást í þar síðasta þætti af Ísland got Talent sem var sýndur á Stöð 2 þann 6. mars.