Töluvert af laxi í Soginu

Sogið hefur sjaldan verið snemma í því að gefa laxa en það stefnir engu að síður í að áin fylgi eftir trendi um góða opnunardaga.

Veiði hófst í Soginu 24. júní og hafa veiðitölur þegar borist af Ásgarði en þar komu alls sjö laxar á land fyrsta daginn sem er óvenjulegt því Sogið er alltaf heldur seint af stað.  Ásgarður gefur þó yfirleitt fyrstu laxana og Bíldsfellið fylgir svo gjarnan á eftir og þar sem svæðin eru á sitt hvorum bakkanum þá sjá veiðimenn hvernig öðrum gengur og myndar það oft skemmtilega stemmningu á milli bakka.  Laxarnir komu upp af Ásgarðsbreiðu og Símastreng en auk þessara laxa sem veiddust sáust fleiri.

Það hafa þegar sést laxar ganga í gegn á Alviðru en það svæði er afskaplega illa stundað þrátt fyrir að hafa í eldri tíð verið aðal svæðið í Soginu.  Það gæti breyst í sumar en verðin hafa lækkað mikið frá því sem áður var.  Laxar hafa sést á Bíldsfells svæðinu og eins á Syðri Brú svo við bíðum spennt eftir fréttum frá fleiri svæðum í Soginu.