Lúxusjeppasprengja í Evrópu

Sala jeppa frá lúxusbílaframleiðendum hefur aldrei verið eins mikil í Evrópu og í ár. Sala slíkra bíla hefur vaxið um þriðjung frá því í fyrra og er þá miðað við tölur fram að október. Heildarsalan hefur náð 185.000 bílum.

Langmesta aukningin hefur orðið í sölu á Volvo XC90 jeppanum, eða um 163% milli ára og nemur sala hans 26.860 bílum. Fyrir vikið hefur Volvo XC90 stokkið uppí annað sætið í sölu lúxusjeppa í álfunni, en þar trónir á toppnum BMW X5 jeppinn með 28.601 selda bíla. Sala BMW X5 hefur aðeins vaxið um 1% á milli ára.

JATO, sem heldur utan um sölutölur í Evrópu býst fastlega við því að Volvo XC90 jeppinn verði söluhæsti lúxusjeppi álfunnar í ár þegar sölutölur síðustu þriggja mánaða ársins eru komnar í hús. Annar jeppi sem selst hefur miklu betur í ár en í fyrra er Audi Q7 jeppinn sem kynntur var af nýrri kynslóð í ár. Hann hefur selst í 24.535 eintökum og salan vaxið um 83% á milli ára. Hann er því í þriðja sæti.

Mercedes Benz GLE er í fjórða sæti með 22.409 selda bíla og 35% aukningu. Það vekur athygli að hinn gamli Land Rover Discovery selst áfram mjög vel og hefur sala hans vaxið um 27% í ár. Ef öll jeppasala Land Rover og Range Rover er talin saman er fyrirtækið með forystuna í seldum bílum því samanlögð sala Discovery, Range Rover og Range Rover Sport er 44.131 bíll.