2000 hestafla Land Cruiser á SEMA

Nú stendur yfir bílasýningin SEMA í Bandríkjunum en þar eru samankomnir breyttir bílar og oft á tíðum afar öflugir. Meðal þeirra nú er þessi Toyota Land Cruiser sem skartar hvorki meira né minna en 2.000 hestöflum undir húddinu.

Vélin í bílnum er 5,7 lítra V8 Toyota vél, en á hana hefur verið bætt tveimur stórum forþjöppum frá Garrett. Bíllinn hefur verið lækkaður á fjöðrum, er á stærri dekkjum og ýmislegt hefur verið gert fyrir yfirbyggingu bílsins til að fá fram betra loftflæði.

Það virðist hafa tekist vel því bíllinn kemst á 220 mílna ferð, eða 354 km hraða og með því er hann orðinn hraðasti jeppi heims og slær umtalsvert við Bentley Bentayga jeppanum.