Veiðisýning á Egilsstöðum 3-6. nóvember

Dagana 3-6. nóvember verður haldin veiðisýning á Egilsstöðum þar sem kynntar verða nýjungar og fleira í skot og stangveiði.

Það þykir kannski skrítið í fyrstu að halda veiðisýningu á Egilsstöðum en í raun ekki því í þessum landshluta er mikil veiði og líklega eini landshlutinn þar sem öll íslensk bráð veiðist.  Austurland er til að mynda með einu veiðilendur hreindýra, þar eru geysilega víðfemd og öflug rjúpnasvæði ásamt því að mikið af gæs heldur sig í þessum landshluta.  Þarna má finna tvær af þekktari laxveiðiám landsins, Selá og Hofsá ásamt fleiri ám sem í veiðist bæði lax og silungur.

"Það verður mikil fræðsla og námskeið bæði fyrir byrjendur og lengra komna veiðimenn" segir Rósa Elísabet Erlendsdóttir en hún hefur veg og vanda að þessari sýningu sem verður haldin í Valaskjálf.  Að sögn Rósu er ennþá verið að leggja lokahönd á sýninguna svo það er ennþá pláss fyrir þá sem vilja komast að með sínar vörur og þjónustu.  "Við endum þetta svo með glæsilegri villibráðarveislu þar sem kokkurinn og veiðimaðurinn Úlfar Finnbjörnsson galdrar fram kræsingar úr villibráð" segir Rósa að lokum.