100 laxa dagar í Ytri Rangá

Ytri Rangá var aflahæst þegar nýjar tölur komu frá Landssambandi Veiðifélaga á miðvikudaginn en þá stóð áin í 1720 löxum.

Það er mokveiði í Ytri Rangá og sem dæmi um það komu 72 laxar á land fyrir hádegi og dagurinn gaf svo í heild 115 laxa sem er ótrúleg tala á þessum árstíma.  Veiðin 12. júlí var til ða mynda 147 laxar en þannig veiði hefur aldrei náðst jafn snemma. Þetta er auðvitað vel þekkt að Ytri Rangáin fer oft í 100 laxa daga á besta tíma en að gera það 12. júlí er nokkuð á undan áætlun.  Það eru góðar göngur í ánna þessa dagana og sumir veiðistaðir orðnir vel setnir af laxi.

Lokatalan í henni í fyrra var 8.803 laxar og á síðasta degi var samt mikið af laxi ennþá í henni og það sem meira er að veiðimenn voru ennþá að fá lúsuga laxa á neðri veiðistöðunum.  Núna þegar það eru fimm dagar í næsta stórstreymi eru veiðimenn við Ytri Rangá mjög kátir enda ekki annað hægt þegar veiðin er svona góð.  Áin fer líklega í 2.000 laxa núna um helgina enda spáin góð og nóg af laxi.