50 laxa metopnun í Blöndu í gær

Met var slegið í Blöndu í gær á fyrsta degi þegar 50 laxar veiddust í ánni á aðeins fjórar stangir.

Þetta er glæsilegasta opnun í Blöndu fyrr og síðar og eftir nokkra eftirgrennslan hefur ekki tekist að finna neinn opnunardag í ánni sem kemst nálægt þessu.  Besta opnun sem Blöndumenn muna eftir var fyrir allmörgum árum þegar opnunarhollið tók 42 laxa á tveimur dögum en 50 laxar á einum degi er ekkert nema veisla og það á fyrsta degi.  "Þetta er bara algjör bilun" sagði Vala Árnadóttir en hún var við Blöndu í gær. "Það er ótrúlegt að vera hérna í svona flottum skilyrðum, áin er hlý, veðrið er gott og það er bara mokveiði.  Af þessum 50 löxum eru tveir smálaxar, hitt er allt stórlax sem kemur í svakalegu flottu ástandi úr sjó" sagði Vala ennfremur.

Það er óhætt að segja að þetta spenni væntingarstuðulinn hátt fyrir komandi veiðitíma því til að setja þetta í smá samhengi t.d. í Blöndu þá er þetta ca. 1% af heildarveiðinni í fyrra sem veiddist í gær og aðaltíminn er ennþá eftir 2-3 vikur samkvæmt venjulegu dagatali og ef þetta er forsmekkurinn af því sem koma skal er erfitt að ímynda sér hvernig framhaldið verður.

Við þetta má bæta að í dag voru 165 laxar komnir í gegnum teljarann í Blöndu.