Hríðfallandi áhorf á Top Gear

Annar þátturinn í nýjustu Top Gear bílaþáttaröðinni var sýndur um helgina og fékk hann lítið áhorf í Bretlandi. Fyrsti þátturinn með nýjum stjórnendum féll áhorfendum ekki heldur vel og var talsvert minna áhorf á hann en að meðaltali þegar Jeremy Clarkson, James May og Richard Hammond stjórnuðu þættinum.

Á fyrsta þáttinn horfðu 4,3 milljónir manna en á annan þáttinn nú um helgina horfðu einungis 2,8 milljónir manna. Er það aðeins á við helmingsáhorf á þættina með fyrri stjórnendum þeirra. Hlýtur þetta að valda BBC, framleiðendum þáttanna miklu hugarangri og í raun var varla hægt að fara í skó gamla þríeykisins og ná sömu hæðum í áhorfi. Það reyndi þó Chris Evans, aðalþáttastjórnandinn nú, en með þessum líka dræma árangri.

Gárungarnir hafa gert grín að áhorfi Top Gear þáttanna nýju og sagt frá því að þátturinn “Antiques Roadshow” hafi náð til 4,7 milljóna áhorfenda, eða nærri 70% meira áhorfi en á Top Gear.