Algjör sprenging í átakinu eftir að strákarnir neituðu að lesa upp textann

Rúmlega 1000 manns skráðu sig sem HeForShe í gær eftir að auglýsingin Kynjajafnrétti er keppnis fór í loftið.

Heimasíðan átaksins hrundi um tíma svo mikill var ágangur fyrst og fremst karlmanna og stráka við að skrá sig sem HeForShe.

Nokkrum leikmönnum í Domino´s deild karla var stefnt í myndver til að búa til auglýsingu fyrir Domino´s deildina.

KR-ingarnir Helgi Magnússon og Pavel Ermolinski, Marvin Valdimarsson og Tómas Heiðar Tómasson leikmenn Stjörnunnar, Finnur Atli Magnússon leikmaður Hauka og Grindvíkingurinn Jón Axel Guðmundsson mættu í myndver að lesa sinn texta. Aftur á móti vissu þeir ekki að verið var að taka upp allt aðra auglýsingu.

Textarnir sem þeir voru beðnir að lesa miðuðu að því að upphefja Karladeild Domino´s á kostnað kvennanna í lífi þeirra körfuboltaiðkun kvenna og stelpna almennt.

Aftur á móti létu þeir ekki segjast og ýmist neituðu að fara með textann eða hlógu að honum!

HeForShe miðar að því að hvetja karlmenn og stráka til vitundar um hvernig þeir geta lagt baráttunni fyrir kynjajafnrétti lið í nærumhverfi sínu.

Samkvæmt rannsókn á vegum UN Women verður kynjajafnrétti náð í heiminum árið 2095 ef við höldum áfram á sömu braut og á sama hraða.

Þegar þessi frétt er skrifuð eru 11.913 karlmenn og strákar hér á landi skráðir sem HeForShe. Til að setja hlutina í samhengi þá eru 12.000 karlmenn skráðir í Þýskalandi og því er árangur okkar Íslendinga frábær. UN Women á Íslandi stefna að því að ná upp í 16.000 í tengslum við Dominos-deildar átakið.