Hannar nærföt fyrir konur á blæðingum

Þetta var þvílíkt ferli að komast að því hvernig ég gæti gert þetta, ég hef verið að prófa þetta á mér sjálfri síðustu átta mánuði," segir Sara Guðný Jónsdóttir, fatahönnunarnemi við Kwantlen Polytechnic University í Vancouver í Kanada. 

Sara hefur hannað nýja línu af nærfötum, Revol Girl, sem konur geta verið í á blæðingum. Engin þörf er fyrir notkun á túrtappa eða álfabikar þegar konur nota nærbuxurnar nema þegar um miklar blæðingar er að ræða. Brjóstahaldararnir eru einnig hannaðir með það í huga að brjóst kvenna stækka almennt vikuna fyrir blæðingarnar.

„Í rauninni er varan túrnærbuxur sem blettir festast ekki í og auðvelt er að þvo. Þrjú efni vinna saman við að búa þetta til, eitt þeirra veldur því að það kemur ekki lykt meðan maður er í þessu, annað dregur í sig vökvann og það þriðja er ekki vatnshelt. Hugmyndin er að eiga kannski sjö nærbuxur til skiptanna á blæðingum," segir Sara.



 



„Ég er búin að vera að vinna í þessu síðan síðasta sumar. Þetta er lokaverkefnið mitt í skólanum. Ég er búin að vera að vinna með sundföt og undirföt síðustu tvö árin og vissi að ég myndi vilja gera eitthvað tengt því í lokaverkefninu mínu. Ég vildi gera femínísk undirföt og hugsaði hvað ég gæti gert sem væri öðruvísi, og byrjaði að hugsa um hvað konur þyrftu og hvað ég gæti gefið þeim," segir Sara.

„Þetta túrnærbuxna trend er bara rétt að byrja en er að vaxa í vinsældum núna. Það eru bara nokkur fyrirtæki að framleiða þetta, og mér fannst öll hönnunin mjög einföld, bara venjulegar nærbuxur sem drógu í sig blóðið. Ég vildi gefa konum eitthvað aðeins meira og aðeins meira spennandi. Þegar maður er á túr vill maður vera í þægilegum nærbuxum og líða vel," segir Sara.

Revol Girl-línan verður frumsýnd á tískusýningu hönnunarnema Kwantlen Polytechnic University þann 6. apríl næstkomandi, og hyggst Sara byrja að framleiða hana sjálf í júní. 

 

Fréttin birtist fyrst í Fréttablaðinu 4. apríl.