Adele leyfir sér ekki að fara á tónleika með Rihanna

Söngkonan Adele hefur ákveðið að banna sjálfri sér að fara á tónleika með Rihanna á Wembley í sumar. Adele verður eitt stærsta atriðið á tónlistarhátíðinni Glastonbury en kvöldið áður mun Rihanna stíga á svið í London.

„Ég elska hana,“ sagði Adele á tónleikum sem hún hélt í London á laugardagskvöld en hún telur að raddböndin hennar geti skaðast eftir tónleika með Rihanna.

„Ég mun án efa missa röddina ef ég fer á tónleika með henni og það er ekki gott kvöldið fyrir mína eigin. Ég er alvarlega að pæla að ferðast alla leið til Coventry til að horfa á Rihanna, eftir tónleikana mína á Glastonbury.“

Adele þarf að hugsa vel um raddböndin en hún þurfti að fara í aðgerð á þeim árið 2011.