Litríkt og forvitnilegt í Læknaminjasafni

Flóð er samsýning einstaklinga, hönnuða og listamanna í Læknaminjasafninu á Seltjarnarnesi sem stendur yfir í Hönnunarmars. Í ár leituðu félagar úr Textílfélaginu eftir samstarfi við hönnuði og listamenn úr öðrum nýskapandi greinum og það er áhugaverð og litrík blanda bíður sýningargesta. Magnea Einarsdóttir fatahönnuður sem sýndi nýja línu sína í síðustu viku á Hönnunarmars stekkur óvænt inn í samsýninguna.

Magnea er stofnandi íslenska fatamerkisins MAGNEA og er útskrifuð úr fatahönnun frá Central St. Martins í London. Hún hefur getið sér gott orð bæði hérlendis og erlendis fyrir hönnun sína. Erlendir gestir samsýningarinnar eru farnir af landi brott og Magneu boðið inn í hana í staðinn. Hún er ánægð með hvernig tekist hefur til. Litríkar ullarflíkurnar standa á gínum í hráu rými Læknaminjasafnsins.

Flíkurnar eru í takt við fyrri verk hönnuðarins, þar sem lögð hefur verið áhersla á prjón og nýja nálgun á íslenska ull.

„Ég frumsýndi línuna um síðustu helgi. Ég er enn að vinna mikið með íslenska ull. Ég blanda henni saman við aðra tegund ullar, til að mynda merínóull. Þá nota ég fíngerð silkiefni sem ég sauma ullina í. Nýja línan er tilvísun í það sem ég var að gera þegar ég byrjaði. Ég er að leita aftur í grunninn.“

Magnea segir áskorun að vinna með íslenska ull. „Það er ástæðan fyrir því að ég vinn með hana. Áskoranir knýja mann áfram. Ég vil að mínar flíkur innihaldi flíkur sem eru úr íslensku hráefni og framleiddar á Íslandi. En ekki eingöngu, ég bind mig ekki við það.“

Litir nýju línunnar minna á haustið. „Ég veit ekki hvort það var tilviljun en það var haust þegar ég var að keyra norður í vinnuferð þegar ég var að vinna að línunni og ég tók mikið af ljósmyndum á leiðinni. Í línunni eru litir sem minna á haustið, vínrauður og gulur til að mynda. Svo langaði mig að vinna með bleika litinn, það er minn gamli uppáhaldslitur og tenging við æskuna.“

Gestir munu hafa margt fleira áhugavert að sjá á sýningunni Flóð. Í kjallaranum er forvitnilegt gróðurhús sem listamaðurinn Brynja Guðmundsdóttir á heiðurinn af og gaman er að þræða sig í gegnum. Þá hefur listamaðurinn María Sjöfn Dupuis Davíðsdóttir gert innsetningu sem fjallar um hlýnun jarðar. Lampar varpa mynd á gólfið með teikningum af jöklum og sýna bráðnun þeirra. 

Greinin/fréttin birtist fyrst í Fréttablaðinu 19. mars.