Die Antwoord og M.O.P. ásamt fleirum á Secret Solstice

Alls hefur 41 nýtt nafn bæst við þá tónlistarflóru sem mun taka yfir Laugardalinn 16.-19. júní næstkomandi á tónlistarhátíðinni Secret Solstice. Á meðal þeirra sem bæst hafa í hópinn er suður-afríska rapptvíeykið Die Antwoord, bandaríski rappdúettinn M.O.P, franski tónlistarmaðurinn St Germain og bandaríska rapptríóið Flatbush Zombies, svo nokkur nöfn séu nefnd.

Þá kemur íslenska rappsveitin XXX Rottweiler hundar saman á hátíðinni í ár og Stuðmaðurinn Jakob Frímann Magnússon ætlar að leiða djassbræðingssveitina sína Jack Magnet kvintett á hátíðinni.

Að öðrum ólöstuðum er Die Antwoord líklega þekktasta nafnið í nýju tilkynningunni frá Secret Solstice. Það eru þau Ninja, Yolandi Visser og DJ Hi-Tek sem mynda sveitina sem stofnuð var í Höfðaborg í Suður-Afríku árið 2008. Sveitin er þekkt fyrir djarfa og litríka sviðsframkomu og þá eru myndbönd sveitarinnar einkar áhugaverð og litskrúðug en mörg þeirra eru með tugi milljóna áhorfa á Youtube.

Sveitin gaf út sína fyrstu plötu, $O$ árið 2009 og fékk um leið mikla athygli og þá sérstaklega fyrir myndböndin sín en Die Antwoord hefur síðan gefið út plöturnar Ten$Ion árið 2012 og Donker Mag árið 2014.

Það má segja að bandarískt hip hop sé í eldlínunni í nýju tilkynningunni en rappdúettinn M.O.P. sem er á leiðinni í Laugardalinn hefur átt farsælan feril og gefið út fjölda platna. Þekktasta lag M.O.P. er án efa lagið Ante Up sem kom út á plötunni Warriorz árið 2000. Billy Danze og Lil' Fame sem mynda M.O.P. gáfu síðast út EP plötuna Street Certified árið 2014 og nutu þar meðal annars liðsinnis rappara á borð við Mobb Deep and Busta Rhymes.

Aðstandendur Secret Solstice, sem bættu við heilum aukadegi fyrir skömmu, leggja mikið upp úr fjölbreytni á hátíðinni og ætla sér að bjóða hátíðargestum upp á sem flestar tegundir tónlistar á hátíðinni.

„Við erum hvergi nærri hætt og munum bæta við fleiri nöfnum þegar nær drengur og halda í hefð hátíðarinnar í tengslum við leynigest eða "secret act". Það er gríðarlega gaman að koma tónleikagestum á óvart eins og við gerðum á síðasta ári með Busta Rhymes,” segir Ósk Gunnarsdóttir kynningarfulltrúi Secret Solstice.

Aðstandendur hátíðarinnar vinna ekki eingöngu hörðum höndum að því að smíða góða tónleikadagskrá. „Við erum með teymi eingöngu í svokallaðari hliðardagsrkrá sem eru viðburðir í kringum hátíðina en þar ber hæst að nefna Into The Glacier, sem er eina partýið innan í jökli í heiminum. Við verðum ekki bara með eina tónleika þar eins og í fyrra heldur 3 dagar og getur fólk valið á milli þess að að njóta raftónlistar og svo órafmagnaðra tónleika,“ segir Ósk.

Þá verður einnig svokallað Midnight Sun Boat Party þar sem farið verður frá hátíðarsvæði Secret Solstice að Reykjavíkurhöfn þar sem siglt verður frá Reykjavík út á Norður-Atlantshafið á slaginu 12 á miðnætti í átt að sjóndeildarhringnum. Fram koma heimsklassaplötusnúðar sem halda partyínu gangandi langt framundir morgun. Einnig fer fram sundlaugapartý í Secret lagoon, í Gömlu Lauginni við Flúðir sem er meira en 120 ára gömul og elsta sundlaug á Íslandi.

Fyrir var búið að boða komu hljómsveita á borð við Radiohead, Deftones og Of Monsters And Men á hátíðina.

Þau nöfn sem bæst hafa við: 

Die Antwoord [ZA]

Flatbush Zombies [US]

Art Department [CA]

St Germain [FR]

General Levy [UK]

Slow Magic [US]

M.O.P [US]

Hjaltalín [IS]

Infinity Ink [UK]

Stacey Pullen [US]

Troyboi [UK]

Section Boyz [UK]

Paranoid London [UK]

Gísli Pálmi [IS]

Novelist [UK]

XXX Rottweiler [IS]

Robert Owens [US]

Maher Daniel [CA]

Glacier Mafia [IS]

Ocean Wisdom [UK]

Reykjavíkurdætur [IS]

Jack Magnet [IS]

Nitin [CA]

Problem Child [UK]

Big Swing Soundsystem [UK]

Lord Pusswhip & Svarti Laxness [IS]

Wølffe [UK]

KSF [IS]

Tanya & Marlon [IS]

Alexander Jarl [IS]

Fox Train Safari [IS]

Kristian Kjøller [DK]

Tusk [IS]

Geimfarar [IS]

Marteinn [IS]

ILO [IS]

Sonur Sæll [IS]

Brother Big [IS]

Rob Shields [UK]

Balcony Boyz [IS]

Will Mills [UK]