Áttræð og sótti um starf sem módel: „Ég var nú bara að gera smá grín“

„Ég var nú bara að gera smá grín,“ segir Ásdís Karlsdóttir í samtali við Vísi. Í gær auglýsti 66° Norður eftir starfsfólki á Facebook-síðu sinni og Ásdís ákvað að sækja um sem fyrirsæta hjá fyrirtækinu með því að deila á þráðinn myndum af sér í hinum ýmsu stellingum. Það þætti eflaust ekki í frásögur færandi nema fyrir þá staðreynd að Ásdís verður 81 árs í sumar.

„Þetta kom nú þannig til að skömmu áður hafði ég tekið þátt í einhverju prófi á netinu sem mælir með starfsvettvangi fyrir mann. Niðurstaða þess var sú að ég ætti að vera módel. Þannig mér datt í hug að setja nokkrar myndir þarna. Ég hef ofboðslega gaman af því að „flippa“ smá og þetta var algert grín,“ segir Ásdís.

Aðspurð segir hún að enn sem komið er hafi enginn haft samband við hana enda hafi þetta nú verið grín. Hún bætir þó við að ef sú staða kæmi upp að henni stæði til boða að vera módel í auglýsingu þá myndi hún ekki slá hendinni á móti því tilboði.

„Ég er hins vegar að verða 81 árs og það er ekki víst að einhver myndi ráða svo gamla konu. Mér þykir hins vegar miður að þegar verið er að auglýsa flíkur þá er það yfirleitt bara gert fyrir ungar stúlkur. Það er til að mynda mjög erfitt fyrir mig, hérna á Akureyri, að ganga inn í tískuverslun og finna kjól sem gæti virkað fyrir mig.“

Ásdís er menntaður íþróttakennari og starfaði sem slíkur við Verkmenntaskólann á Akureyri í tuttugu ár eða allt þar til hún varð 67 ára. Þá var hún um skeið heimavinnandi húsmóðir en hún eignaðist alls sex börn og barnabörnin eru orðin átján. Eitt barnabarn hennar er ansi þekkt nafn innan íslensku rappsenunnar en Ásdís er amma Kött Grá Pjé. „Ég kíkti á tónleika með honum fyrir einu eða tveimur árum þar sem ég var alveg langelsti gesturinn inni á Græna Hattinum,“ segir hún og hlær.

„Ég skoða netið bæði í gegnum tölvu og svo er ég líka með iPad sem ég nota. Tölvuna nota ég aðallega til að rita æviminningar mínar sem ég ætla afkomendunum. En það er líka hægt að nota þetta til að skemmta sér. Síðan reyni ég að fara í göngutúra og hreyfa mig helst daglega,“ segir Ásdís og bætir við að lokum, „hví ætti maður ekki leika sér og hafa gaman þegar maður er gamall?“