Ótrúleg viðbrögð þegar þau héldu að þau hefðu unnið 130 milljarða

Það er draumur allra að vinna í lottói en upphæðirnar sem hefur verið hægt að vinna í Powerball í Bandaríkjunum undanfarnar vikur eru ótrúlegar.

Síðastliðin laugardag var um einn milljarður Bandaríkjadollarar í pottinum, eða því sem samsvarar 130 milljörðum íslenskra króna. Þetta eru tölur sem fáir hreinlega skilja en 42 starfsmenn á veitingarstaðnum Grissini’s í New Jersey höfðu fjárfest saman í miðum og allt leit út fyrir að þeir væru að fara skipta með sér öllum þessum milljörðum.

Gríðarlegur fögnuður braust út á staðnum og einn starfsmannanna sagði strax upp í vinnunni en þá kom í ljós að þau voru að skoða miða sem átti við á miðvikudeginum á undan. Réttar tölur, vitlaus dagur. Fagnaðarlætin náðust á myndband og má sjá viðbrögð þeirra hér að neðan.

Hver starfsmaður hefði unnið 22,5 milljónir dollara eða því sem samsvarar þrír milljarðar íslenskra króna. Síðastliðin laugardag rann potturinn í Powerball því ekki út og var dregið aftur í gær. Þá skiptu þrír með sér 210 milljörðum íslenskra króna.