Öllu tjaldað til hjá Stórsveitinni

„Við vorum að æfa í dag og það gekk alveg stórvel, enda meistarar í hverju horni hjá Stórsveit Reykjavíkur,“ segir Andrea Gylfadóttir söngkona. Hún verður gestasöngvari á tónleikunum Gullöld sveiflunnar í Silfurbergi í Hörpu á morgun, sunnudag, ásamt Páli Rósinkrans, þar sem Stórsveit Reykjavíkur fagnar nýja árinu með því að flytja lög í frumgerð þeirra frá árunum 1930 til 1945.

Þetta er í fjórða sinn sem stórsveitin heldur tónleika um áramót sem hún helgar þeim eina og hálfa áratug á síðustu öld sem sveiflan var í algleymingi, því má segja að þeir séu orðnir að árvissum viðburði.

„Það voru margir snillingar í tónlistinni á þessum tíma, milli 1930 og 1945,“ segir Andrea og nefnir Benny Goodman, Artie Shaw, Jimmy Lunceford, Cab Calloway, Charlie Barnet, Les Brown, Glenn Miller, Duke Ellington og Count Basie meðal þeirra eftirminnilegustu.

Sjálft kveðst hún oft hafa sungið með stórsveitinni gegnum tíðina, bæði nýtt og gamalt efni og alltaf haft gaman af. „Þetta verða galatónleikar,“ segir hún. „Mér var úthlutað lögum sem stjórnendur bigbanda á þessu magnaða swing-tímabili útsettu fyrir söngkonur. 

Andrea segir söngvarana ekki í aðalhlutverkum á tónleikunum, heldur eins og hljóðfæri með part af lögunum.  „Bigböndin voru svo big,“ útskýrir hún og tekur fram að tónleikarnir hefjist klukkan 17 í Silfurbergi og stjórnandi þeirra og kynnir sé Sigurður Flosason.