Hvernig á að slíta sambandi: Alls ekki dömpa gaur á flugvelli

Það eru margir sem sitja eftir í sárum þegar þeir slíta sambandi við maka sinn og hafa ófáir söngvarnir verið sungnir þar sem leitast er eftir töfralausn til að losna við ástarsorg. En er til einhver ein rétt leið til að hætta með maka sínum þannig að báðir aðilar komi vel út úr því?

Lilja Katrín hjá Íslandi í dag fór á stúfana og reyndi að svara þessari spurningu. Hún talar meðal annars við Theodór Francis Birgisson, sambandsráðgjafa hjá Lausninni - fjölskyldumiðstöð, sem segir að það sé afar einfalt fyrir pör að halda lífi í sínu sambandi - bara einfaldlega tala við hvort annað og mynda þannig góða vináttu.

Hjúkrunarfræðingurinn og blaðamaðurinn Ragnheiður Eiríksdóttir tekur í sama streng og telur verstu sambandsslitin vera þau sem lykta af svikum, til dæmis þegar annar hvor aðilinn finnur sér nýjan elskhuga áður en hann slítur sambandi við þann gamla.

Rödd unga fólksins heyrist líka hátt og snjallt í innslagi Lilju Katrínar en lífsstílsbloggarinn Hlynur James Hákonarson er að eigin sögn hræðilegur í að hætta með stelpum og lætur þær yfirleitt alls ekki vita af því. Þá hætti Reykjavíkurdóttirin Anna Tara Andrésdóttur einu sinni með strák á flugvelli í útlöndum og mælir alls ekki með því.