Byrjaði að prjóna í fótboltaferðalögum

Hinn þrettán ára gamli Akureyringur Vilhelm Ottó Biering Ottósson fékk snemma áhuga á prjóna- og saumaskap og hefur undanfarna mánuði verið iðinn við að sauma og prjóna slaufur. „Ég hef alltaf haft gaman af því að búa eitthvað til í höndunum og byrjaði að prjóna til dæmis húfur í fyrravor. Þegar ég var ný orðinn þrettán ára byrjaði ég að prjóna slaufur og svo í haust byrjaði ég að sauma slaufur,“ segir Vilhelm Ottó um upphafið á saumaskapnum. „Ég fór eiginlega að prjóna og sauma af fullri alvöru vegna þess að ég var eiginlega of ungur til þess að sækja um vinnu.“

Hann segir að handavinnukennarinn sinn sé ákaflega ánægður með þann gífurlega áhuga sem hann hefur sýnt prjóna- og saumaskapnum. „Jú, handavinnukennarinn er sáttur við mig,“ segir Vilhelm Ottó og hlær. Hann sér um að hanna og búa til slaufurnar alveg sjálfur. „Kennarinn minn kenndi mér hvernig maður á að gera þetta.“

Hann segir það taka um það bil klukkustund að prjóna eina slaufu en að sauma slaufu taki örlítið styttri tíma. „Maður er aðeins fljótari að sauma en þá þarf maður að undirbúa slaufuna eins og til dæmis að strauja efnið, setja títuprjóna og þræða saumavélina,“ útskýrir Vilhelm Ottó sem stofnaði fyrir skömmu Facebook-síðu þar sem hægt er að skoða og panta slaufur.

Fyrir utan sauma- og prjónaskapinn hefur Vilhelm Ottó gaman af íþróttum og er til dæmis að æfa bæði körfubolta og fótbolta, ásamt því að vera nemandi í 8. bekk í Glerárskóla. Hann hefur til dæmis nýtt fótboltaferðalögin vel og prjónað á meðan hann er ekki að sparka í knöttinn og segir að félögunum þyki þetta frekar kúl. Hvernig hefur hann tíma fyrir þetta allt saman? „Maður verður að nýta tímann vel og forgangsraða rétt. Það tekur ekkert það langan tíma að gera slaufu, ég geri stundum eina og eina slaufu á kvöldin áður en ég fer að sofa,“ segir Vilhelm Ottó og hlær.

Vilhelm Ottó segist hafa saumað og prjónað í kringum hundrað slaufur á sínum ferli. „Ég hef líklega prjónað um fjörutíu slaufur og saumað um sextíu slaufur.“ Slaufurnar og aðrar vörur eftir Vilhelm Ottó hafa verið til sölu í versluninni The Viking á Akureyri og í Jólahúsinu í Eyjafirði.

Þá var mikið að gera hjá honum fyrir jólin. „Já, það var mjög mikið að gera í desember, einn daginn fór ég ekki út úr húsi, ég sat við saumavélina og straujaði allan daginn. Ég held að bara ég sjálfur hafi selt um þrjátíu slaufur í desember og svo líka auðvitað í búðunum. Ég veit líka að útlendingarnir voru hrifnir af prjónuðu slaufunum, það hafa einhverjar slaufur farið til Þýskalands, Spánar og Dubai,“ segir Vilhelm Ottó. Þá voru slaufurnar vinsælar jólagjafir fjölskyldunnar.

Hann fékk fyrir skömmu saumavél ömmu sinnar og er hæstánægður með hana. „Þetta er öflug saumavél þó hún sé dálítið gömul, ég held hún sé frá 1960 en hún er góð.“

Hann langar að framleiða alls kyns fatnað í framtíðinni og er til dæmis nýbyrjaður að sauma klúta. „Mig langar að gera meira og hef verið að hugsa um það. Ég held samt að þetta sé gott í bili en ég ætla gera meira í framtíðinni,“ bætir Vilhelm Ottó við.