Aflaukning en minni eyðsla í nýjum Porsche 718 Boxster

Ávallt tekst Porsche að auka afl bíla sinna og í leiðinni að minnka eyðslu þeirra svo um munar. Í nýrri gerð Porsche Boxster, sem nú hefur fengið stafina 718 hefur afl aukist um 35 hestöfl bæði í hefðbundinni gerð hans og í S-gerð hans, en eyðsla beggja bílanna hefur í leiðinni minnkað um 13%.

Báðir fá þeir nú fjögurra strokka vélar í stað sex strokka áður. Porsche 718 Boxster er með 2,0 lítra vél sem er 300 hestöfl og eyðir aðeins 6,9 lítrum og 718 Boxster S fær 2,5 lítra vél sem er 350 hestöfl og eyðir 7,3 lítrum á hverju hundrað ekna kílómetra.

Bílarnir hafa auk þess fengið öflugri bremsur og algjörlega nýjan undirvagn og fjöðrun sem tryggir enn meiri sportlega eiginleika en í forveranum, en var hann þó góður áður. Mikil breyting hefur einnig orðið á innviðum bílsins, til að mynda gerbreytt mælaborð með snertiskjá.

Þetta er í fyrsta skipti frá sjöunda áratug síðustu aldar sem Porsche bíður nú bíl með fjögurra strokka vélum, en nú eru þær komnar með forþjöppur. Þær auka mjög á tog vélanna og hefur það aukist um 100 Nm í 718 Boxster og er nú 380 Nm, en í 718 Boxster S hefur aukningin orðið 60 Nm og samtals 420 Nm. Næst það tog fram á 1.900 til 4.500 snúningum.

Fyrir vikið eru bílarnir þónokkuð sneggri og tekur það 718 Boxster nú 4,7 sekúndur að komast í 100 km hraða og 718 Boxster S er 4,2 sekúndur í 100. Það gerir þessa nýju kynslóð 718 Boxster 0,8 sekúndum fljótari og 718 Boxster S 0,6 sekúndum fljótari.

Hámarkshraði aflminna bílsins er 275 km/klst og þess aflmeiri 285 km/klst. Báða bílana má fá með beinskiptingu, sem og PDK sjálfskiptingu. Porsche mun hefja sölu nýs 718 Boxster þann 30. apríl í Evrópu og mun hann kosta frá 53.646 evrum í Þýskalandi, en 718 Boxster S kostar frá 66.141 evru.