Börn fæðast fordómalaus: Sjö prósent þjóðarinnar með erlent ríkisfang

Innflytjendaráð í samstarfi við velferðarráðuneytið hefur hleypt af stokkunum átaksverkefninu „Við fæðumst fordómalaus - hvað svo?“. Verkefninu er ætlað að skapa umræðu um þá fordóma.

Það er nokkuð ljóst að fullorðið fólk getur lært heilan helling af börnum. Innflytjendaráð fékk auglýsingastofuna Árnasyni, í samstarfi við framleiðslufyrirtækið Tjarnargötuna og Ævar Vísindamann, til að taka stutt viðtöl við nokkur íslensk börn og biðja þau um að svara örfáum spurningum tengdum fordómum.

Börnin sýndu fádæma fordómaleysi þegar þau svöruðu vandalaust spurningum eins og „veist þú hvað innflytjendur eru?“ sem eitt barnið svaraði svo fallega: „Ég held það sé vinátta.“

Á Íslandi búa 24.300 einstaklingar með erlent ríkisfang, sem er 7,4% þjóðarinnar. Fólk kemur hingað af margvíslegum og mismunandi ástæðum, t.d. einstaklingar og fjölskyldur sem koma hingað í leit að nýjum tækifærum, ævintýraþrá er hvati einhverra og eins kemur hér fólk sem þurft hefur að flýja heimkynni sín.

Þetta er fólk með fjölbreyttan bakgrunn, reynslu, menntun og þekkingu og auðgar samfélagið á margvíslegan máta.

Þá má geta þess að opið er fyrir umsóknir í þróunarsjóð innflytjendamála og eru áherslur sjóðsins að þessu sinni tengd átaksverkefninu, á verkefni og rannsóknir sem beina kastljósinu að mannauðnum sem býr í innflytjendum og þeim styrk sem innflytjendur færa íslensku samfélagi, auk rannsóknar- og þróunarverkefna sem stuðla að virkri þátttöku innflytjenda í samfélaginu og auka sýnileika þeirra.

Hér að neðan má sjá þessa frábæru stuttmynd sem allir geta lært svo mikið af.