Vil gera meira í eigin nafni, stofna bönd og semja

Ég er frekar mikið að spila úti um allt með mismunandi fólki og á mismundandi stöðum svo dagarnir snúast um æfingar og gigg, ég er í skóla líka svo það er dálítið púsl að láta allt ganga upp. En þetta mallar einhvern veginn,“ segir Anna Gréta Sigurðardóttir djasspíanisti, sem var valin bjartasta vonin í djass- og blúsflokki á Íslensku tónlistarverðlaununum 2015 og stundar nú nám við Kungliga musikhögskolan í Stokkhólmi. Nýlega fékk hún að upplifa landsbyggð Svíþjóðar í vetrargallanum því hún ferðaðist í tvær vikur um Norrbotten-svæðið með Norrbotten Big Band, einni bestu stórsveit þar í landi. „Það var æðislegt – en það var kalt. Fór í 17 gráður í mínus,“ segir hún. „Við fluttum tónlist sem var skrifuð af ungu fólki á svæðinu og útsett af big-bandinu. Leið bandsins til að ná til yngra fólks.“ Hún kveðst hafa komist í ferðina gegnum Håkan Broström, einn af fremstu saxófónleikurum Svíþjóðar. „Ég var að spila með Håkan í hljómsveitinni hans og í kvartettum og hann spilar líka með Norrbotten Big Band ásamt fleiri frábærum sólóistum.“ Anna Gréta flutti til Stokkhólms undir haust 2014 og er ánægð. Spurð hvort hún hafi kunnað sænsku þegar hún kom út svarar hún: „Nei, ég fékk að læra hana hér. Það voru svona tveir mánuðir í myrkrinu og svo opnaðist allt skyndilega og ég fór að skilja. Mér finnst Stokkhólmur æðisleg borg og það eru flottir djasstónlistarmenn hérna. Fólk er líka mjög meðvitað um jafnrétti í bransanum hér, án þess að ég ætli að fara að gagnrýna Ísland.“ Hún á eitt og hálft ár eftir í skólanum en hyggst búa áfram í Stokkhólmi og halda áfram að spila. „Svo vil ég gera meira í eigin nafni, setja saman eigin bönd og semja.“ Spurð hvort fleiri ferðalög séu á döfinni svarar hún: „Ekki langir túrar en ég og söngkonan Stina Agustsdottir, sem býr hérna, erum með verkefni sem heitir Björkologi, það er tónlist Bjarkar í okkar eigin djass­útsetningum, og við ætlum að túra um Svíþjóð í mars og apríl. Svo ætlar pabbi, Sigurður Flosason, að koma í júní og þá tökum við einhver sumargigg saman.“ gun@frettabladid.is