Everybody loves Raymond stjarna látin

Doris Roberts, gamanleikkona sem best er þekkt fyrir leik sinn í gamanþáttaröðinni vinsælu Everybody loves Raymond, er látin. Hún lést á sunnudaginn síðastliðinn níræð að aldri.

Roberts starfaði sem leikkona, bæði í kvikmyndum og á leiksviði, í mörg ár áður en hún landaði hlutverkinu sem Marie Barone, móðir Raymond Barone, í þáttunum fyrrnefndu. Hún var á starfsferli sínum tilnefnd til ellefu Emmy-verðlauna, þar af sjö fyrir hlutverk sitt í Everybody loves Raymond. Hún vann í fimm skipti, þar af fjögur fyrir túlkun sína á frú Barone.

Leikkonan lést í Los Angeles en ekki hefur verið upplýst um dánarorsök.