Afmá glansmyndir Instagram og Facebook af móðurhlutverkinu

Okkur langar að taka þessa glansmynd aðeins út úr myndinni,“ segir Sólrún Lilja Diego, ein þeirra fimm ungu mæðra sem hrintu af stað vefsíðunni mamie.is, þar sem þær leggja markvisst upp úr að gera ungum mæðrum kleift að finna svör við spurningum sem kunna að vakna. Auk Sólrúnar eru það Lena Björk Dam, Lísa Rún Kjartansdóttir, Júlíana Birgisdóttir og Saga Ýr Kjartansdóttir sem sjá um að upplýsa ungar mæður um allt milli himins og jarðar.

„Þetta byrjaði í raun þannig að Lena heyrði í mér, en hún var í þeim sporum að hún var ófrísk, en enginn annar í kringum hana var á svipuðum stað svo hana sárvantaði upplýsingar,“ útskýrir Sólrún og heldur áfram: „Í fyrstu leist mér ekkert á þetta en svo fór ég að spá aðeins í þessu, enda vel þeginn félagsskapur þegar maður er í fæðingarorlofi.“ Sem kom á daginn, því Sólrún hefur verið ansi iðin við að nýta sér tímann þegar dóttir hennar, Maísól, sefur. „Ég ætlaði eiginlega ekkert að skrifa en hef svo eiginlega endað á að skrifa mest,“ segir hún og skellir upp úr.

Segir Sólrún viðtökurnar vera með ólíkindum og að þær stöllur hefðu engan veginn gert sér í hugarlund hversu mikið erindi síðan átti í raun við ungar mæður. „Við fengum yfir þrettán hundruð heimsóknir á einum sólarhring, en við settum síðuna í loftið seinni part laugardags og varð algjör sprenging,“ bendir hún á. Greinilegt er því að eitthvað vantar upp á í upplýsingagjöf til ungra frumbyrja ef marka má þær spurningar og aðsókn sem Mamie hefur fengið.

„Flestar ungar mæður eru vissulega í svokölluðum bumbuhópum, en ég verð að segja að þær upplýsingar sem þar koma fram eru ekkert alltaf þær sem maður er að leita eftir, og svörin oft ansi misjöfn, sem þýðir að erfitt getur verið að taka mark á þeim,“ bendir Sólrún á.

„Ég fékk til að mynda heilmikið af fyrirspurnum um hvernig ég undirbjó Maísól út í vagn að sofa, þar sem þó nokkrar mæður vissu ekkert um hvernig best væri að haga því í kólnandi veðri. Eitthvað sem eflaust einhverjum finnst auðsvarað, en það er ekki svo sjálfsögð vitneskja fyrir aðrar.“ Sólrún segir Snapchat-reikning Mamie sömuleiðis hafa notið mikilla vinsælda, og þar séu þær að fá fjölmargar fyrirspurnir úr öllum áttum, og það auðveldi ef til vill aðgengi ungu mæðranna að hinum ýmsu upplýsingum.

„Ég viðurkenni fúslega að mér þótti frekar skrýtið að byrja að taka af okkur mæðgum snapp alla daga, enda hafði ég fram að því ekki verið mikill snappari,“ segir Sólrún og bætir við að þó hafi það komist furðu fljótt upp í vana og nú snappi hún eins og vindurinn fyrir þá fimmtán hundruð sem þegar hafa stokkið á vagninn. „Ætli ég hafi ekki fundið mest fyrir þessu þegar ég fór með vinkonu minni í Smáralind og hún fór að spyrja hvort ég væri ekkert að hugsa um hver þarna hefði verið að horfa á snappið frá mér þann morguninn,“ skýtur hún að og skellihlær.

Sólrún segir stelpurnar gríðarlega ólíkar, en hópurinn þekktist svo gott sem ekkert áður en samstarf hófst. Eiga þær í raun býsna fátt sameiginlegt annað en að vera nýbakaðar mæður sem allar hafi verið í námi áður en afsprengin létu til sín taka, en þó geta þær sammælst um að glansinn sem sjáist svo iðulega á Facebook og Instagram megi alveg missa sín. „Við erum að sýna raunveruleg barnaherbergi og koma með alvöru sniðugar hugmyndir. Þau eiga ekkert að vera æðislega geggjuð og eins og klippt út úr tískublöðum. Við erum ekki að einblína á það sem er flottast og fínast, það er nóg af síðum sem gera það.“